Kliente ou motorista sira ne’ebé trata dokumentu kareta no motor husu Governu atu kria banku sukursal iha Diresaun Nasionál Transporte Terestre (DNTT) Comoro, ho nune’e bele fasilita sira ho lais no diak liu tan.
“Atu selu de’it ami atu selu iha banku ho distanisia ne’ebé do’ok, barak hetan dezastre, tanba duni tempu, ho ida ne’e, Governu presiza tau atensaun ba problema hirak ne’e”, motorista Julito Xavier ba jornalista sira iha DNTT, bainhira komisaun E Parlamentu Nasionál (PN) hala’o fiskalizasaun iha DNTT, Comoro-Díli, Kinta (02-07-2020).
Husi sorin seluk, Diretór Jerál (DJ) DNTT, Natalino do Rosario, hateten, maske durante ne’e DNTT halo ona koordenasaun ho Ministériu Finansas (MF) no banku, maibé to’o ohin loron laiha rezultadu.
“Ita boot sira haree DNTT iha Hera no Balide iha ona banku sukursal, nune’e, hodi fasilita kliente sira la presiza halai ba mai iha DNTT Comoro mak banku seidauk tau sukursal, ami tenta nafatin, nune’e bele tau banku sukursal iha DNTT Comoro. Kria banku sukursal iha Comoro hodi fasilita kliente sira labele lori invoice halai ba mai, sé la’e kliente sira sempre halai ba mai atu selu iha banku ne’ebé ho distansia do’ok tebes”, tenik Natalino.
Ho preokupasaun hirak ne’e, Prezidente Komisaun E PN, Abel Pires, promete sei hato’o ba Ministru Transporte no Komunikasaun, atu bele rezolve.
Entretantu DNTT Comoro kada loron atende kliente trata dokumentu kareta no motor hamutuk atus 4 resin.
Governu presiza hadia edifísiu no kondisaun iha DNTT
Diretór Nasionál Transporte Terestre (DNTT), Natalino do Rosário, informa, Governu presiza hadia edifísiu no kondisaun ba funsionáriu sira ne’ebé servisu iha Diresaun Nasionál Transporte Terestre (DNTT) Comoro.
Tanba realidade hatudu kondisaun edifísiu refere nia plafon hahú aat no moru atu monu ona, espasu la sufisiente atu atende kliente sira trata dokumentus transporte kareta no motor.
Alende ne’e, Diretór DNTT Comoro, Natalino do Rosário, rekoñese, kondisaun iha DNTT, liu-liu funsionáriu sira kestiona kona-bá nível salariál.
Prezidente komisaun E PN, Abel Pires hateten, atu hasa’e rendimentu naun petrolíferu tenke prepara kondisaun, tanba kondisaun la adekuadu susar ba funsionáriu sira atu hasa’e redimentu.
“Ita tenke rezolve situasuan ne’e ho emerjénsia, importante ne’e iha Orsamentu Jerál Estadu (OJE) tinan 2020 ba kondisaun edifísiu tinan barak ona seidauk iha renovasaun, DNTT menus fasilidade no rekursu umanu”, tenik Abel.
Funsionáriu ne’ebé servisu iha DNTT Comoro hamutuk 18, kompostu husi funsionáriu públiku na’in 14 no funsionáriu kontratadu na’in 4.
Antes ne’e, komisaun E PN hala’o ona fiskalizasaun iha DNTT Balide, Hera no Comoro, nota katak maioria edifísiu DNTT tolu (3) ne’e menus fasilidade no rekursu umanu.
Tanba ne’e, orsamentu tinan 2020 komisaun E PN sei tau prioridade ho nesesidade ne’ebé urjente. san
