Osan dolar Amerikanu falsu sirkula maka’as ona iha povu Timor-Leste (TL) nia leet. Tanba ne’e Tersa (07/07/2020), ema uza osan falsu ho montante dolar rua nulu (USD 20) lohi vendedór João Araújo hodi sosa ninia tanjeriña.
Kazu ne’e akontese iha suku Bairu-Pite, postu administrátivu Dom Aleixo, munisípiu Díli, mais ou menus tuku 02:00 lorokraik, oras Timor-Leste.
Vítima João Araújo, haktuir ema uza osan falsu ne’e ho motorijada ida, mai husi Diresaun parte Oeste, wainhira to’o iha Bairu-Pite hodi sosa João nia tanjeriña, maibé uza osan dolar falsu.
“Nia sosa mós ha’u la koñese ema ne’e ida, nia ho motor, ha’u haree númeru osan mós lalos. Nia foti osan USD 20 entrega mai ha’u, depois ha’u volta fali osan USD 18 fó ba ema ne’e, ikus mai ha’u haree osan ne’e falsu fali”, esplika vítima João Araújo, ba GMN Tersa (07/07/20), iha Bairu-Pite Díli.
Vítima João Araújo hato'o ona keisa ba iha Polísia munisípiu Díli, hodi submete ba prosesu investigasaun.
Segundu Komandante PNTL munisípiu Díli Superintendente Euclides Belo esplika kazu osan falsu ne’e la’os foin akontese, maibé akontese dala tolu ona.
Tanba ne’e PNTL sei lansa servisu informasaun hodi buka tuir aútor sira ne’ebé mak involve hodi falsifikasaun.
“Klaru katak, ne’e aktu krime falsifikasaun, ami sei koordena ho Ministériu Públiku, nia prosedimentu prosesual ne’e ami sei lori nafatin ba oin, mahon ba Ministériu Públiku tomak, maibé kompeténsia ne’ebé mak kódigu prosesu penal atribui ba PNTL ne’e ami komprimenta ida ne’e, buka liu husi mekanismu oin-oin ne’ebé mak iha ne’e hodi deskobre suspeitu involve. Tanba ne’e apela ba komunidade kuandu ema ruma hola imi nia sasán,kuandu taka kapasete tenke haree didiak osan nia kualidade, ne’e fasil liu ema lohi ferik katuas”,dehan Euclides Belo.
Vendedór João Araújo ho idade 67, mai husi aldeia Liquiça, suku Fada-Bloko, postu Remexio, munisípiu Aileu. avi
