Primeiru Ministru (PM), Taur Matan Ruak, deside fatin arte moris, oferese ba Konsellu Kombatente Libertasaun Nasionál (KKLN), hodi halo servisu, tanba durante ne’e KKLN laiha fatin hodi hala’o sira nia kna’ar.
“Ami reprezenta Konsellu Kombatente Libertasaun Nasionál, mai hasoru PM koalia kona-ba, konsellu laiha fatin hodi halo servisu, iha oportunidade ne’e relata mos aktividade konsellu nian ba PM,” dehan, Prezidenti Administrasaun Konsellu Kombatentes Libertasaun Nasionál, Vidal de Jesus “Riak Leman”, iha Palásiu Governu, Segunda (06/07/2020).
Riak Leman subliña liutan, agora KKLN iha garantia ona husi PM, dehan katak buka fatin no dalaruma konsellu ba halo servisu iha arte moris Comoro, tamba iha grupo balun mak iha ne’eba, nia kondisaun seida’uk diak, tamba ne’e konsellu sei hadia fatin ne’e, no Estadu mos sei ba koalia ho grupo balun ne’ebé hela iha fatin refere, hafoin konsellu ba halo servisu.
Veteranu ne’e hatutan, sei halo reabilitasaun ba fatin ne’e, konsellu presiza fatin ne’e tamba, desde konsellu hamrik to’o agora fatin seidauk iha.
“Durante ne’e konsellu halo servisu kona-ba, rezolve problema veteranus nian, tamba ne’e iha ona Ministeriu, iha ona Ministru no Sekretariu Estadu, hodi haree planu ruma kona-ba rezolve situasaun veteranus nian, to’o agora konsellu hamrik seida’uk iha orsamentu, tamba ita nia Estadu moris hela ho orsamentu duodesimu,” esplika, ‘Riak Leman’.
Riak Leman afirma, PM rona hotu saida mak konsellu hato’o, no PM prontu atu apoiu konsellu hahu ho fatin ne’ebé nia rasik indika arte moris.Cin
