Primeiru Ministru (PM), Taur Matan Ruak, promete sei fasilita vistu laiha prazu ba misionáriu Katóliku ne’ebé mak hakna’ar-an iha Timor-Leste (TL).
Ho nune’e, Xefi Governu, Taur Matan Ruak, esplika, situasaun polítika ne’ebé akontese iha Timor-Leste, ba reprezentante Vatikanu iha Timor-Leste, Ministru Interior ne’e mós promete sei fó vistu laiha prazu ba misionáriu ne’ebé servisu iha Timor-Leste.
“Primeiru-Ministru konvida ha’u atu fó informasaun kona-ba atividade Governu ni'an, kona-ba rezolusaun krize polítika kompletamentu Oitavo Governu ni'an no kona-ba mos rekuperasaun ekonómika ne’ebé agora hanesan mós programa Governo nini'an. Alende ne’e Xefi Governu informa mos mai ha’u kona-ba difikuladade ne’ebé Governu enfrenta durante pandemia COVID-19,” dehan reprezentante Vatikanu iha Timor-Leste, Monseñor Marco Sprizzi, iha Palásiu Governu, Sesta (10/07/2020).
Monseñor Marco Sprizzi, hatutan, koalia mos kona-ba kooperasaun sira iha ambitu entre Governu ho igreja Katólika iha Timor-Leste, ne’ebé servisu hamutuk ho povu hodi haree ba bein estar povu ni'an, liu-liu kona-ba ambitu kooperasaun sira iha área edukasaun, saúde no iha akompañamentu ba ema kiak sira.
Monseñor Marco Sprizzi ne’e subliña mós, koalia ho PM kona-ba vistu ba misionáriu estranjeiru sira ne’ebé servisu iha Timor-Leste, ne’ebé dalaruma sira simu vistu permanensia ba tempu badak tebes no sira ne’ebé akompaña vida povu sira ni'an iha área remota sira, kada tinan ou kada fulan neen tenke mai iha Ministériu Interior atu renova sira nia vistu.
“Maibé sira balun iha Timor-Leste besik tinan tolu nulu ona, entaun Xefi Governu nu’udar mós Ministru Interior fasilita misionáriu sira hodi fó permisaun ba sira mínimu ba tinan lima no sei laiha prazu, tanba misionáriu sira ne’e servisu ba bein estar povu ni'an no la simu osan ruma,” afirma, Monseñor Marco Sprizzi. Cin
