Ministru Asuntu Parlamentár no Komunikasaun Sosiál (MAPKS), Fransisco Pereira Jerónimo, konsidera, ekipamentu iha studio iha Grupo Média Nacional (GMN) mesak modernu de’it.
Ho nune’e, nia parte kongratula mós esforsu GMN TV ni’an, tanba konsege harii média ho sistema dijitál.
“Hau halo vizita mai media GMN TV atu kongratula katak sai televizaun ne’ebé nia stúdio modernu, hau husu ba empreza atu bele hadi’a nafatin, nafatin sai empreza ida ne’ebé favoritu ba Timor-Leste”, MAPKS iha edifísiu GMN TV, Bebora-Díli, Kinta (09-07-2020).
Governante ne’e apresia mós GMN TV, tanba bele sai matadalan ba Governu hodi bele dezenvolve servisu média iha Timor-Leste.
Diretór Informasaun GMN TV, Francedes Suni, espera ho vizita husi Ministru ho ninia ekipa bele hametin liu tan kooperasaun, hodi hametin dezenvolvimentu média iha Timor-Leste.
“GMN TV agradese inisiativa Ministru atu bele halo vizita ida ne’e no sai hanesan oportunidade ba Ministru atu bele koñese besik nia servisu iha área komunikasuan no haree kondisan média no traballadór sira, oportunidade ba GMN TV hodi bele introduz ninia-an no hato’o nia progresu, dezafiu no obstákulu durante ne’e enfrenta”, dehan Francedes.
Entretantu GMN harii iha tinan 2003 no lansa GMN TV, Rádio Nacional FM no plataforma online iha tinan 2017. ida
