GMN TV Sosiedade FONGTIL: Polítiku sira hatene politiza GAM iha tempu kampaña

FONGTIL: Polítiku sira hatene politiza GAM iha tempu kampaña

2 views

Diretór Ezekutivu Forum Organizasaun Naun Governamentál Timor Leste (FONGTIL), Daniel dos Santos Carmo,  polítiku sira iha ámbitu kampaña eleitorál aproveita deit Grupu Arte Marsiál (GAM) sira hodi atinji sira nia metas, maibe sa’e tiha ba Governu inkapasidade atu kontrola membru GAM sai husi fronteira ilegálmente ba hasa’e sintu iha Indonézia.

Daniel dos Santos Carmo, hateten, polítiku sira ne’e mak agora dadaun lidera hela governasaun ne’e, tan ne’e husu Sekretaria Estadu Juventude no Desportu (SEJD), liu-liu Komisaun Reguladora Arte Marsiais (KRAM), atu hatudu kapasidade hodi kontrola grupu sira ne’ebé tama sai fronteira ilegálmente hodi ba sa’e sintu, iha ámbitu COVID-19.

“Demonstra sira-nia inkapasidade, atu koalia ne’e hanesan ne’e, tanba ne’e mak kuandu to’o iha eventu sira kampaña polítiku, sira hotu-hotu sa’e ba palku, koalia dehan arte marsial, sira politiza ita nia arte marsiais sira, mais sira ba ukun, sira la halo buat ida, atu reorganiza foin sa’e sira”,hateten Diretór Ezekutivu FONGTIL, Sesta (16/07), iha salaun Caicoli.

Sosiedade Sivil ne’e lamenta tebes ho pasajen illegal sira ne’e, tanba dadaun ne’e variante foun Delta, espalla ona iha territóriu Repúblika Indonézia nian.

Organizasaun ne’e mos lamenta ho SEJD ne’ebé sai fali sasin ba akordu ne’ebé halo entre grupu arte marsial balun iha Timor no Indonézia, hodi bandu arte marsiais iha Timor labele ba sa’e sintu iha Indonézia.

Maibé foin lalais ne’e, forsa seguransa Indonézia nian, kaptura tan membru arte marsiais kuaze 14, ultrapsa ilegálmente husi fronteira Timor ba Indonézia.

“Ita kestiona SEJD, oinsa mak atu follow up ba akordu ida ne’e, apakah ne’e hanesan akordu ida atu asina deit, depois la follow up, ne’e la pudia halo akordu. Entaun iha momentu ida ne’e hatudu katak, SEJD la kontribui ba governu Timor Leste iha intermus prevene virus variante ne’ebé iha Indonézia labele tama ita nia rain” lamenta nia.

Hatán ba lamentasaun sira ne’e, Prezidente KRAM, Octávio da Conceição ‘Anus’ hatete, regulamentu sira ne’ebé atu regula GAM, dadaun ne’e iha ona faze konsultasaun públiku no entrevista, hafoin hakat ba faze elaborasaun lei sira, sei termina iha fulan ne’e.

“Hahú halo peskiza iha nível munisipiu sira, hodi rona entidade hotu-hotu, komunidade hotu-hotu iha munisipiu sira nia hanoin, kona-ba oinsa maka bele hamosu pakote lejislasaun sira ne’ebé nesesáriu hodi kontrola atividade arte marsiais iha futuru’’, konfirma prezidente KRAM, iha nia knaar fatin SEJD Bidau Lecidere Sesta (16/07).

Prezidente KRAM ne’e mos dezmente deklarasaun sosiedade sivíl nian, kona-ba sai sasin ba akordu grupu arte marsiál TL ho Indonézia.

“Lalos, SEJD-KRAM la halo lejitimasaun ka aktu legál ruma ho organizasaun ida ho nasaun seluk. So Governu deit mak iha kompeténsia própria para atu halo akordu kooperasaun bilaterál ho nasaun seluk”, termina prezidente KRAM.

Antes ne’e, iha rezolusaun númeru 16/2013 kona-ba ekstinsaun ba grupu arte marsial, bandu atividade arte marsiais tolu hanesan PSHT, Kera Sakti no KORK, labele hala’o atividade grupu nian.

Maibé iha fulan Fevereiru tinan 2020, Konsellu Ministru liuhosi reuniaun extra ordináriu, hamosu tan rezolusaun númeru 4/2020 hodi revoga fali rezolusaun númeru 16/2013.

Nune’e SEJD fó kedas orientasaun ba KRAM atu hahú prosesu administrativu sira, hodi reativa fali atividade arte marsial sira nian, ne’ebé antes ne’e lei bandu.

Dadus ne’ebé GMN asesa, dadaun ne’e grupu arte marsial no Federasaun 21 mak rejista ona iha KRAM.San


Banner

Foto

Notisia Ikus

Governu adia aprovasaun ba realojamentu vítima DN

September 27, 2021
Governu liu husi reuniaun Konsellu Ministru (KM)...

PM Taur: TL lakon fundadór ida

September 27, 2021
Primeiru Ministru (PM), Taur Matan Ruak, hamutuk...

Alkatiri: Ma’huno sai luta povu tomak nian

September 27, 2021
Sekretáriu Jerál Partidu FRETILIN, Marí Alkat...

Komisaun F bolu urjente MS Odete

September 26, 2021
Komisaun F Parlamentu Nasionál trata asuntu Sa...

Xanana: Ha’u ho Ma’huno mak reorganiza rezisténsia armada

September 26, 2021
Eis komandante Em Xefe FALINTIL, Kay Rala Xanana...
1 2 3 644

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker