Komunidade Aldeia Marboro, Suku Ailok, Postu Administrativu Cristo Rei, Munisípiu Dili, konsume bee mota, tanba bee moos laiha.
Xefi Aldeia Marboro, Aires do Rego, hateten, komunidade iha Aldeia Marboro ne’e, moris ho vida agrikultor. Tanba ne’e, Aires do Rego husu ba Governu atu tau matan ba komunidade sira iha Aldeia ne’e, li-liu kona ba bee.
“Koomunidade iha ne’e, moris depende ba modo, entaun se bee laiha, entaun sira labele kuda modo. Entaun ho VIII Governu ida ne’e, ami husu para oinsa atu bele hadia netik ba komunidade iha Aldeia ne’e, atu sira bele kuda modo, hodi buka osan ba hadia sira nia moris,” dehan Aires do Rego ba GMN iha Aldeia Marboro foin lalais ne’e.
Xefi Aldeia Marboro ne’e mós relata, alende bee, komunidade iha Aldeia ne’e mós halerik kona ba estrada, tanba iha tempu udan, laiha transporte atu halo movimentu to’o ne’eba.
“Estrada ne’e, tempu bailoron, kareta ida rua barani mai, maibé tempu udan bee sobu hotu estrada ne’e, entaun komunidade sira labele lori sira nia modo ba sidade no sosa buat ruma husi sidade mai,” afirma Aires.
Tanba ne’e, Aires husu ba Governu atu tau matan ba povu ki’ik sira iha Aldeia Marboro ne’e, li-liu hadia estrada hodi sira halo movimentu diak atu fa’an sira nia modo.
“Iha tempu kampaña, lideransa sira tu’un ba baze ko’alia kona ba atu halo mudansa ba povu nia moris, entaun povu la ejize ba Governu atu fahe osan ba sira, maibé sira husu atu tau matan netik ba bee no estrada atu povu bele hadia sira nia moris,”katak Aires.cos
