Arsebispu Metropolitanu Díli, Dom Virgílio do Carmo da Silva, SDB, preokupa joven barak komesa lakon ona atitude bázika, kumprimenta inan-aman no família sira no pior liu mak ema boot sira mak fila fó kumprimenta fali ba sira.
Dom Virgílio do Carmo da Silva, SDB, hato’o kestaun ne’e, iha nia ómilia, wainhira prezide misa iha parokia Imaculada da Conceição Balide, Segunda (10/08) ne’ebé partisipa husi akólitu sira iha Asosiasaun Akólitu Vigaría, Díli.
Bispu Dioseze Díli ne'e esplika, tempu agora joven sira influensia ho mundu teknolojia modernu, tanba foinsa’e sira dau-daun ne’e la uza tempu barak ba ajuda inan-aman no estuda, maibé uza tempu barak liu ba buat ne’ebé la importante hanesan dansa ida ho naran koñesidu tik tok.
“Inan aman balun hateten oan sira dalabarak la ativu misa no ajuda kaer servisu uma-laran, tanba hader tarde, pior liu mak oan sira hader tarde, maibé hader telefone iha nia liman kedas, hodi fokus ba tik tok inan-aman mak kolen komprimenta fali oan sira”, dehan Dom Virgílio.
Dom Virgílio esklarese, joven balun ne’ebé uza telefone modernu ne’e, la uza hodi buka materia atu estuda hodi aumenta matenek, maibé uza fali telefone ba buka fali buat seluk ne’ebé la importante.
Bispu ne'e mos aproveita uportunidade ne'e hodi apela ba joven akólitu sira atu banati tuir São Tarcísio nia ain-fatin, hodi hala’o kna’ar ba serve altar santu ho di'ak. Tanba São Tarcísio, nu’udar Santu ida ne’ebé nia domin bo’ot ba Jesus nia santísimu, nune’e akólitu sira atu buka Jesus nafatin liu husi servi altar santu.
Iha tinan ne'e, Asosiasaun Joven Akólitu organiza peregrinasaun ne’ebé perkore parokia hirak ne’ebé mak pertense iha vigária Díli ho vizita Ilas São Tarcísio ne’ebé hanesan padroeiru ba akólitu sira, nune’e mós hanesan ezemplar ba joven Katóliku hotu, tan luta ba defende Kristo iha Eukaristia Santa.
Asosiasaun akólitu vigária Díli ne’ebé hamahan no halibur asosiasaun akólitu hotu husi parokia Metinaru, Hera, Bedois, Becora, Balide, Katedral, Comoro, Ai-Mutin no Motael, hamutuk hodi forma estrutura ida ne’ebé reprezentativa ba akólitu parokia sia (9).
Ilas São Tarcísio nia vizita dahuluk, hahú iha parokia Metinaru, Hera, Bedois, Becora, Balide no sei kontinua ba Katedral, Comoro, Ai-Mutin, Motael no sei ensera misa iha monumentu Nossa Senhora Largo Lecidere. Tos
