Grupo Média Nacional (GMN) asina akordu kooperasaun servisu ho Raes Hadomi Timor Oan (RHTO), hodi fó sai informasaun ho tipu ka lian jestual ba ema ho defisiénsia iha GMN-TV atu nune’e ema defisénsia tilun sira bele asesu informasaun hodi bele kompriende.
Akordu ne’e asina husi Diretór Informasaun GMN, Fransedes Suni no Diretór Ezekutivu RHTO Joãocito Dos Santos, ba durasaun tinan ida ho objetivu atu fó sai asuntu defisénsia jestual, iha GMN, atu nune’e ema defisénsia tilun sira bele asesu ba informasaun.
Akordu ne’e asina iha salaun enkontru RHTO Raes Hadomi Timor Oan Likintai Díli Segunda (17/08/20).
“Ha’u hanoin GMN asina MoU ho RHTO tanba parte rua ne’e iha ona kompromisu ho objetivu oinsá mak GMN bele sai inkluzivu ba defisénsia, liu-liu bele promove, bele hasa’e inkluzaun defisiénsia liu-liu ba asuntu defisiénsia jestual bahasa isyarat iha GMN, liu-liu ema defisiénsia tilun bele asesu ba notísia GMN ninian”, esplika Diretór Ezekutivu RHTO, Joãocito Dos Santos, hafoin asina tiha akordu kooperasaun iha edifísiu RHTO.
Alénde ne’e, Diretór Informasaun GMN, Fransedes Suni, hateten, ema hotu-hotu bele asesu ba informasaun inklui ema defisiénsia sira. Tanba ne’e Diretór informasaun GMN konsidera akordu ne’ebé mak asina ona importante atu nune’e instituisaun rua ne’e bele servisu hamutuk ba oin.
“GMN nia lema Lori Timor ba Mundu, maibé ba ha’u espesialmente ami labele lori Timor ba mundu la kompletu, Timor iha nia povu Timor iha nia rai, sé koalia povu ita sira ne’e hotu”, dehan Fransedes Suni.
Alende ne’e Parternership For Human Development ka (PHD), liu husi Embaixada Austrália iha Timor-Leste, iha kompromisu hodi suporta ema defisiénsia iha nasaun ne’e, iha área edukasaun, saúde no seluk tan.
“Atu informa ba ita boot sira katak Governu Australia liu husi PHD nafatin iha komitmentu boot hodi suporta ba inkluzaun ema defisiénsia iha Timor-Leste ida ne’e, liu-liu buat barak ita halo ona, nafatin tau importánsia ba kualker aktividade, ezemplu iha setór saúde ami prioritiza ema defisiénsia bele asesu ba saúde, setór edukasaun”, dehan reprezentante PHD, Isau Borges.
Tuir dadus ema defisiénsia hamutuk rihun tolu nulu resin ualu, no ema rihun rua ne’ebé sai benefisiu ba iha RHTO.
Marka prezensa iha seremonia asina akordu ne’e Board RHTO, reprezentante Ministériu Solidariedade Sosial no Inkluzaun. avi
