Karpinteiru kompañia Zepara Mega Comoro (ZMC), Domingos Soares, informa, Segunda (17/8) ne’e parte husi kompañia mai entrega meza foun tolu (3) ba Parlamentu Nasionál (PN) ne’ebé antes ne’e hetan estragus husi deputadu balun iha PN.
“Ami hanesan kompañia lori mai de’it meza tolu ba iha PN, kona-bá atu monta meza ne’e só tékniku sira mak bele monta“, Karpinteriu kompañia ZMC ba jornalista sira hafoin entrega meza ba PN ne’e.
Husi sorin seluk, Sekretária Jerál PN, Cedelizia Fária dos Santos, informa, orsamentu ne’ebé PN gasta hodi prepara kadeira no meza Prezidensia PN ne’ebé antes ne’e hetan estragus husi deputadu balun hamutuk USD 4000 resin.
“Orsamentu ne’ebé mak ami gasta ba meza tolu (3) kompletu ho kadeira ne’e kuaze USD rihun 4 resin, ne’ebé halo husi kompañia husi Timor-Oan, meza ba Prezidente PN diferensia ho meza ba Vise PN na’in rua. Foin la-lais promete sei hatur hikas meza Prezidensia PN ne’e iha loron 30, fulan Agostu, maibé monu iha loron Domingu no haree ba deputadu sira sei resesu hela“, tenik Sekretária Jerál PN ne’e.
Cedelizia subliña, dau-daun ne’e PN seidauk fiksa loron atu hatur hikas meza Prezidensia PN ne’e, no tuir kalkulasaun atu hatur kadeira no meza refere sei gastu osan lubuk ida, tanba sei halo mós serimónia kultura husi lia na’in sira.
“Tuir estimasaun atu hatuur hikas meza parlamentu foun ne’e, sei gasta osan USD rihun 25 ne’ebé sei lori lia-na’in husi munisípiu sira no meza foun ne’e seidauk bele hatur hikas iha loron 30, fulan Agostu, ne’e monu iha loron Domingu no deputadu sira sei iha resesu no kona-bá fiksa loron sei deside iha reuniaun líder bankada. Iha semana ida ne’e nia laran ita sei iha reuniaun líder bankada, foin deside loron bainhira mak atu hatur hikas meza PN foun”, relata Sekretária Jerál PN ne’e.
Cedelizia espera mós katak, hafoin resesu sei halo diskusaun ba Dotasaun Orsamentu Temporáriu (DOT) no prioridade mós ba pagamentu meza Prezidensia PN foun.
“Deputadu sira la halo fiskalizasaun, tanba deputadu sira sei resesu hela. PN nia koordenasaun hahú ami halo ona hanesan Sekretáriu Estadu Arte no Kultura (SEAK), Ministériu Administrasaun Estatal (MAE) ha’u fiar sei halo ho koordenasaun ho munisípiu agora hein de’it data fiksu koordenasaun ho igreja iha momentu ne’ebá Prezidente PN reuniaun ho Arsebispu Díli nia koordenasaun to’o agora la’o hela“, relata Sekretária Jerál PN ne’e.
Entretantu meza tolu ne’e, ida ba Prezidente PN no rua ba Vise Prezidente PN. Meza refere kompañia halo durante fulan ida.
Meza Prezidente PN ne’ebé antes ne’e hetan estragus, tanba deputadu sira husi bankada CNRT, FRETILIN, KHUNTO ho PLP hada’u malu kadeira Prezidente PN, iha loron 19, fulan Maiu, tinan ne’e.ety
