Sala leitura Xanana Gusmão (SLXG) hamutuk ho Youth Comunity Care (YCC), selebra loron mundial juventude ho tema “Hakbi’it foin-sa’e sira liu husi kultura hadomi lee”.
“Ami husi SLXG hamutuk ho YCC selebra loron ne’e ba juventude iha mundu espesial ba joven iha Timor-Leste”, dehan Koordenadór Operasionál SLXG, Manuel Rebelo Soares ba jornalista sira, Kuarta (12/08/2020), iha Jardin Palásiu Governu.
Koordenadór Operasionál SLXG, afirma, aspirasaun husi SLXG ba loron ohin mak hakarak joven hotu iha Timor sai joven ida ne’ebé di'ak no labele sai de'it hanesan instrumentu, maibé sai mós hanesan inspirasaun ba ema seluk.
“Ohin (Horiseik) ami hamutuk ho YCC enkoraja joven sira atu lee barak, tanba lee mak loke dalan ba ema hotu atu komprende barak no koñese mundu nia luan. Iha SLXG ami halibur joven barak ne’ebé durante ne’e ba aprende lee, asesu ba livru sira, inklui internet hodi aprende buat barak”, subliña Manuel.
Nia hatutan, SLXG iha tum-tum ida hanesan biblioteka movel ne’ebé bele inspira ema seluk, katak maske simples, maibé bele halo netik buat ruma ba joven sira, liu husi asesu ba livru, nune’e bele lee barak liu tan.
“Alende tau livru iha tum-tum hanesan biblioteka movel, ami mós iha programa tum-tum ni'an ne’ebé sei halo iha tempu badak, hanesan tum-tum sei ba iha fatin ne’ebé determina tuir programa no atividade ne’ebé preparadu. Ami seidauk loke ba Públiku biblioteka movel ne’e, maibé ami koko la'o hadulas iha área balun hodi komesa lori livru tama sai atu ema asesu ba livru sira ne’ebé iha mak livru referensia Timor-Leste no livru ba labarik sira”. Fel
