Eis Komandante em Xefe FALINTIL, Kay Rala Xanana Gusmão, haktuir, pregu ne’ebé Timor-oan sira lori ba vota iha loron 30 Agostu, tinan 1999, reprezenta ruin no raan sira ne’ebé nakfakar no namkari iha Timor laran tomak. Maibe joven Timor-oan sira ne’ebé aprende oitoan matenek sai ema diak ona ne’e vota ba integrasaun ho Indonézia.
Xanana nia vizita iha suku refere simu husi juventude aldeia refere ho motocros hafoin Xanana Gusmão simu konvite husi juventude Assalainu hodi partisipa iha komemorasaun loron 30 Agustu ba dala 21 iha suku refere.
Iha nia diskursu, Xanana Gusmão, hateten, povu Timor-Leste nia votu iha loron 30, Fulan Agostu 1999 ne’e mak determina povu nia sofrimentu durante tinan 24 nia laran husi okupasaun Indonéziu.
“Ita hatene ita-nia kbiit, ho kilat ita sei la duni (Indonézia). Ita so bele duni, hodi povu nia partisipasaun. Ho pregu, ho lapis, pregu ne’e nia sentidu polítiku loloos mak ruin ne’ebé namkari husi ita-nia martires sira, ferik ho katuas sira karik ruin ne’ebé namkari iha ita-nia rai tú (vota), inimigu sai. Ita komemora loron konsulta popular (30 Agostu). Ha’u fiar iha ha’u-nia fuan, ferik ho katuas sira vota hotu a favor ba independénsia, matenek oan sira ne’e mak vota ba integrasaun, ne’e joven oan sira ba aprende ona, sai ema diak ona, servisu ona ne’e mak vota ba integrasaun. Ferik ho katuas sira ne’ebé terus husi 1975 to’o 1999 sira mak tú ita manan”,dehan Kay Rala Xanana Gusmão, Domingu (30/8/2020), ne’ebé vizita Aldeia Assalainu, Munisípiu Lautem.
Iha okaziaun ne’e mós Xanana Gusmão husu juventude sira iha Munisípiu Lautem atu kria paz no estabilidade atu nuné kontribui ba dezenvolvivemntu Timor-Leste.
Rezultadu husi loron konsulta popular (30-08-1999) no aunsia rezultadu iha 4 de setembru 1999. Opsaun Total Votus % Autonomia 94,388 (21%) no Ukun A’an 344,580 (78.5%).GMN
