Líder karismátiku Kay Rala Xanana Gusmão, iha Kuarta semana ne’e, halo vizita ba suku Villa Maumeta, hodi sensibiliza informasaun kona-bá prevensaun Corona Virus Disease 2019 (COVID-19), ne’ebé dau-daun ne’e sai problema mundiál.
Alende halo sensibilizasaun, líder karismátiku ne’e apoia mós máskara ba autoridade lokál no autoridade seguransa, atu oinsa bele kontribui prevene COVID-19 iha Ataúru.
“Haree tuir informasaun kala rai ki’ik hanesan Timor-Leste ne’e 4 ka 5 de’it mak seidauk. Ida bee agora iha ita-nia rai ne’e mai husi liur, maibé seidauk menular iha ita-nia leet, seidauk da’et ba ita rasik. Perigozu teb-tebes, tanba ne’e mak ha’u la’o hodi fó hatene ba populasaun tomak, ferik no joven sira atu kuidadu, tanba iha mundu aumenta ba bei-beik, depois sira taka tiha, liu fulan balun tan buat ne’e sa’e fali, maibé nasaun barak mak riku, produtu barak, teknolojia barak mais la konsege hapara”, Eis Prezidente Repúblika ne’e liu husi ninia diskursu wainhira hala’o sensibilizasaun no apoiu máskara ba komunidade sira iha suku Villa Maumeta, postu administrativu Ataúru, munisípiu Díli, Kinta (05-08-2020).
Relasiona ho COVID-19 ne’ebé dau-daun ne’e sai ameasa boot ba nasaun hotu-hotu, Xanana Gusmão, husu ba komunidade sira atu koopera ho autoridade seguransa no autoridade lokál, nune’e bele kontribui ba prevensaun virus refere.
“Nasaun barak labele salva nia populasaun husi COVID-19, tanba menus kontrolu no la tuir protokolu Organizasaun Mundiál Saúde (OMS) ni’an ne’ebé estabeles ona”, tenik líder karismátiku ne’e.
Entretantu máskara hirak ne’ebé Xanana Gusmão apoia ba autoridade lokál no autoridade seguransa ho totál hamutuk kaixa hitu (7), alende ne’e mós Xanana fahe mós nesesidade báziku ba komunidade kbi’it la’ek sira ne’ebé identifikadu ona iha suku refere.
Líder karismátiku ne’e distribui mós matéria desportu ba joven sira iha suku 5 iha postu administrativu Ataúru mak hanesan Bola, Farda, Rede no seluk tan. san
