Klibur Juventude Nasíonalista Timorense (KJNT) fó apoiu ba atuál Deputadu António de Sá Benevides, atu kompete iha eleisaun Prezidensiál ne’ebé sei realiza iha tinan 2022.
Tanba tuir klibur, António de Sá iha koñesimentu polítika interna no externa, iha abilidade ba língua internasionál, nomós iha kapasidade lideransa atu rezovle dinámika polítika sira.
“Ami hakarak deklara ba Públiku ho firmeza no prontidaun tomák, atu kandidata ami nia kandidatu independente Maun Deputadu António de Sá Benevides ba Prezidente Repúblika” deklara Portavoz KJNT Armindo Fernandes de Carvalho, liuhosi konferénsia imprensa iha Klak Fuik, Suku Camea, Domingo (08/08).
KJNT mós konsidera katak, povu barak lakon ona fiar ba lidér partidu polítiku ne’ebé, dadaun ne’e kaer ukun, maibé halo povu moris deit ho situasuan inserteza nia laran.
“Bazeia ba análiza KJNT, nasaun doben Timor Leste (TL) oras ne’e tama hela iha ambiguidade, degradasaun morál no krize lideransa, ho situasaun ida ne’e halo povu moris iha inserteza no obskurantismo” tenik Armindo.
Maske klibur juventude ne’e deklara fó apoiu ba Antonío de Sá Benevivides ba Prezidente repúblika, maibé atuál Dpeutadu ne’e rasik seidauk deklara ofisialmente atu kandidata aan.
Dadaun ne’e partidu KHUNTO mak ofisialmente deklara atuál prezidente partidu, Armanda Berta dos Santos, atu kompete iha eleisaun Prezidensiál tinan 2022.Ags
