Sobrevivente Komité 12 Novembru, lakon tan membru José Morato ho idade (47), iha loron 13, fulan Agosto ne’e, iha Hospitál Nasionál Guido Valadares (HNGV), tanba sofre moras struk.
Matebian José Morato família evakua ba HNGV iha loron 12, hodi halo tratamentu intensivu, maibé to’o HNVG la konsege salva vida no matebian mate iha Kinta dader.
Ho situasaun ne’e família husu, Governu atu tau matan ba feto faluk no oan ki’ak, tanba durante matebian nia moris kontribui mós ba luta Timor-Leste nian.
“Sente triste, tanba lakon ona aman ne’ebé mak hanesan fó forsa mai ita sente laran todan, tanba husik hela oan mesak hanesan hau,”dehan Melquision de Jesus Morato, nu’udar oan-mane daruak, ba GMN iha sala Mortuáriu HNGV, Bidau, Sesta (13/08).
Prezidente Komité 12 de Novembru, Grigório Saldanha hato’o sentidu kondolensia profunda ba família matebian, no husu ba família atu hato’o informasaun ba organizasaun bainhira família prejiza ajuda ruma husi Governu.
“Nesesidade ruma kona-ba oan nia eskola ka moras kontaktu nafatin Komité 12 de Novembru ita hotu hanesan moris sei mate, Komité la halo buat barak Komité hatutan de’it Governu nia liman ain atu kompleta saida mak prejiza fó ba kolega sira balun moris balun mate ona ita sei serbisu nafatin nune’e direitu balun sei presiza família sira hetan tuir lei hateten” dehan Prezidente Komité 12 Novermbru.
Matebian José Morato, moris iha Munisípiu Manufahi iha loron 16, fulan Novembru tinan 1974, husi inan Terezinha da Costa Franco, no aman Octávio José Morato no matebian iha maun alin na’in neen.
Matebian husik hela nia kaben, Natália Perreira no oan na’in tolu kompostu husi mane ida no feto na’in rua.
Família no amigu sira lori ona matebian ba nia rezidénsia ikus Loes-Maubara, no tuir planu sei halo’ot iha loron 17 fulan ne’e, iha Semitério dos Herois Liquiça.Ina
