Organizasaun Naun Governamentál La’o Hamutuk (LH) prefere Governu hadia de'it lei númeru 13/2009 kona-ba lei Orsamentu no Jestaun Finanseira (OJF), duke halo lei foun hodi hamosu fali duvida ba públiku.
Lei foun ne’e mak lei Enkuadramentu Orsamentál no Jestaun Finanseira, ne’ebé aprezenta hosi Governu, hodi hadi’a rejime Orsamentu Jerál Estadu (OJE) no jestaun finanseira públika nian, atu-bele aumenta klareza, estabilidade, fleksibilidade no transparénsia.
Peskizadóra LH, Elizaria Febe Gomes hateten, bainhira Governu halo lei foun, presiza halo ajustamentu ho lei númeru 13/2009 ne’ebé nia implementasaun la’o hela.
“Se ita hamosu lei ida atu hamenus fali transparánsia, nusa ita la hadia, maibé halo fali lei foun” dehan Peskizadóra LH, Elizaria Febe iha nia kna’ar fatin Bebora Díli (07/08).
Sosiedade Sivíl ne’e mós haruka ona submisaun balun ba Parlamentu Nasionál (PN) atu hadia no kompleta artigu balun ne’ebé la fó biban ba sosiedade sivíl atu fó rekomendasaun ruma kona-ba jornada orsamentál nian.
“Tuir la’o hamutuk tenki fó espasu ba públiku liu-liu ba média nomós sosiedade sivíl atu fó sira nia input ka submisaun antes lori ba iha Parlamentu, atu nune’e bele iha netik mudansa tuir duni realidade ne’ebé iha, bazeia ba ema hotu nia komentáriu la’os tuir de’it Governu nian” nia informa.
Proposta lei Enkuadramentu Orsamentál no Jestaun Finanseira, iha prinsípiu 10 resin kona-ba orsamentu sira ne’ebé konsta iha Lei Orsamentu no Jestaun Finanseira.
Proposta Lei Enkuadramentu Orsamentál no Jestaun Finanseira ne’e, diskute ona iha Parlamentu Nasionál, Komisaun C no D, iha faze espesialidade.Eca
