Diretór Forum Organizasaun Naun Governamentál Timor-Leste (FONGTIL), Daniel Santos do Carmo, la konkorda ho deklarasaun Ministru Prezidénsia Konsellu Ministru, Fidelis Leite Magalhães nian, ne’ebé hatete, sidadaun vasina dala rua sei la la’o livre, durante períodu Konfinamentu Domisiliáriu Jerál (KDJ).
Sosiedade Sivíl ne’e konsidera, deklarasaun ne’e kontráriu ho medida ne’ebé Konsellu Ministru rasik prodúz iha komunikadu ne’ebé publika ona iha pájina Governu nia, iha loron 25, fulan Agostu ne’e.
“Ha’u hanoin, saida mak señor Ministru koalia ne’e, nia koalia la hanesan ho medida eskrita ne’ebé fó sai, signifika ita tenke kumpri mak eskrita ne’e, ita labele rona de’it ita halo tuir ida ne’e, ne’e laloos. Iha nasaun demokrátiku buat hotu iha regra, regra hanesan ne’e ita halo tuir, se regra la hanesan ita labele halo tuir,”dehan Daniel Santos do Carmo, iha Díli Sesta (27/08).
Nia hatete, sidadaun sira presiza mak kumpri regulamentu eskrita ne’ebé iha, labele rona de’it membru Governu sira koalia, no halo, tanba sira koalia dala ruma la tuir regulamentu ne’ebé iha.
Enkuantu, antes ne’e, Fidelis Manuel Leite Magalhães, deklara katak, sidadaun sira vasina kompleta ona hela hotu iha uma durante KDJ.
“Relasiona ho vasina tiha ona, vasina dala rua ona, ba loron hitu nia laran, Governu husu atu ita labele preokupa lai ho vasina tiha ona ka seidauk, ita hela hotu iha uma lai” dehan Fidelis, Kuarta (25/08), Iha Palásiu Governu Díli.
Maibé regra ne'ebe KM aprova iha Kuarta (25/08) mak hanesan, Bandu sirkulasaun transporte públiku sira, liuliu taksi, mikrolete, biskota no anguna hodi halo sirkulasaun iha área hotu-hotu munisípiu Dili nian.
Suspende selebrasaun relijioza koletiva sira, no bandu organizasaun ka realizasun serimónia fúnebre ne’ebé envolve partisipasaun ema na’in sanulu liu, sira ne’ebé, durante serimónia ne’e rasik tenke uza máskara oin nian hodi taka inus no ibun, no mantein distánsia, pelumenus metru ida.
Estabelesimentu komersiál, industriál, artezanál ka prestasaun servisu nian taka ba públiku, ho exesaun ba estabelesimentu sira ne’ebé fa’an ai-han no sasán nesesidade bázika nian, eletrisidade, telekomunikasaun sira, prestasaun kuidadu médiku, farmásia, postu kombustivel nian, no instituisaun finanseira sira kontinua loke.
Maibé iha komunikadu ne’ebé GMN asesa, la sita sidadaun ne’ebé vasina kompletu la la’o lívre tuir promesa Primeiru Ministru Taur Matan Ruak nian, iha semana hirak liu-ba katak, se mak vasina kompleta bele la’o lívre ona iha territóriu nasionál.
Sosiedade Sivíl mós husu ba parte Seguransa ne’ebé destaka iha pontu entrada Díli nia, atu autoriza no labele bandu sidadaun sira ne’ebé vasina kompleta ona, atu ba Munisípiu, tanba la hakerek iha medida KDJ.Ags
