Cruz Vermelha Timor- Leste (CVTL), komemora loron primeiru sokoru ba dala 100 resin. Komemorasaun ne’e hodi fo hanoin fali konsimentu primeiru sokoru ba komunidade sira kona-ba asidenti deméstiku.
“Ami ohin (horiseik-red) selebra loron ne’e, atu fo hanoin ba komunidade, liu liu ba ema hirak ne’ebé hetan ona treinamentu konaba primeiru sokoru, atu hanoin katak, primeiru sokoru ne’e importante, hanesan ita hatene katak, primeiru sokoru ne’e, wainhira asidenti ruma akontese iha fatin ne’ebé deit, akontese asidenti domestiku, no la iha ema ruma fo tulun, entaun primeiru sokoru hanorin ita oinsa tulun ita-nia maluk sira ne’ebé presija tulun,”dehan Prezidenti José Pereira da Conceição, ba Jornalista sira iha CVTL, Dili, semana kotuk.
José haktuir, iha selebrasaun ne’e, sira hala’o atividade hanesan dada sorteitu ba kaixa primeiru sokoru nian, hala’o sosializasaun ba komunidade sira, liu liu kona-ba koñesimentu loron primeiru sokoru, ne’ebé hetan apoiu husi federasaun Internasional Cruz Vermelha.
Iha fatin hanesan, treinador Primeiru Sokoru, Martinho José da Costa, realsa, durante sira fo treinamentu ba komunidade sira ne’ebé hela iha kapital no area rural sira, hala’o treinamentu hanesan, oinsa komunidade hatene hala’o prevensaun ba kanek ruma, no mos oinsa halo evakuasaun vítima sira ne’ebé hetan asidenti ba fatin seguru, molok ambulansia to’o iha fatin akontesimentu.
Nia realsa, iha area rural, ba ikus nian mak sira fo treinamentu loron tolu iha area rai mutin, Munsípiu Manatuto, no sira fo treinamentu ba ema hamutuk 25.
“Lor-loron, ami-nia voluntariu sira tuir treinamentu iha CVTL, servisu hamutuk Ambulansia nasional, fo hela ajuda ba sira ne’ebé presija tulun primeiru sokoro, no wainhira ami la hala’o atividade refere, maibe ami hala’o tiha atividade seluk, mak ami hetan akontesimentu primeiru sokoru, ami sempre fo tulun” dehan nia.Oly
