Amu Vigáriu ka Segundu Asistente Parókia Balide, Arnaldo Soares Pereira Babo, hakotu iis iha Kinta (24/09/20) dadersan, tanba atake kardíaku, bainhira Amu Arnaldo Soares Pereira Babo tuur hela iha rezidénsia Parókia Balide, Díli.
Wainhira rona tiha amu nia mate, Polísia Nasionál Timor-Leste (PNTL) no Polísia Sientífika Investigasaun Kriminál (PSIK), to’o iha amu nia rezidénsia iha Balide, hodi halo ezaminasaun no haree amu nia liman parte los no karuk iha ran, maibé parte doutór Patolójia sira deklara ba Arsebispu Metropolitana Díli, Dom Virgílio do Carmo da Silva, katak, Amu Arnaldo Soares Pereira Babo, hakotu iis, tanba ataka kardíaku.
“Depois estudu doutór sira deklara katak laiha agresaun fíziku ida ne’ebé envolve lori padre Arnaldo ninia mate. Sira dehan katak, sira haree hotu ona ohin ita haree sinais ran sai husi nia liman, tanba nia tuur kleur demais ona, entaun ran mak sulin, tuir médiku esplika hanesan ne’e duni, ohin sira dehan laiha sinais ruma afeta, husi PSIK no PNTL inklui doutór sira sertifika ida ne’e, entaun núdar família ita simu ida ne’e, provavelmente mate ne’e sira dehan bee karik iha ninia fuan ou buat ruma mak provoka nia ba mate. Ne’ebé ita simu entrega ba parókia hodi prepara. Aban tuku 11 ita halo misa funébre, tanba depois ida ne’e, ha’u sei ba iha Oe-Cusse”, Arsebispu Metropolitana Díli ne’e liu husi nia esplikasaun hafoin obrserva tiha Amu Arnaldo Soares Pereira Babo, ninia mate iha Balide, Díli.
Amu Vigáriu ka Segundu Asistente Parókia Balide, Arnaldo Soares Pereira Babo, moris iha aldeia Duhoho, suku Haufu, postu administrátivu Letefoho, munisípiu Ermera, iha loron (4/4/1975), oan husi Januario Babo no inan Lucia Soares. Amu Arnaldo núdar oan ba daruak husi maun-alin na’in ualu no amu ne’e sai hanesan bibi-atan hahú iha tinan 2010 no koloka iha Parókia Imaculada da Conceição Balide, iha tinan 2020 ne’e. avi
