Porta-Voz Grupu Rezisténsia Nasionál Defende Justisa no Konstituisaun (RNDJK), Ângela Freitas, hateten, ema ne’ebé vandalizmu loloos iha rai ida ne’e mak viola konstituisaun no asalta podér iha Parlamentu Nasionál (PN).
“Ita haree dau-dauk saída mak akontese liu-liu bankada FRETILIN, PLP no mós KHUNTO akuza RNDJK RDTL ne’ebé mak atu mobiliza massa Distritu 13 atu defende konstituisaun, maibé sira hateten ami sei lori armas brankas no ami grupu vandalizmu. Ne’e akuzasaun falsu, ami laiha kilat iha liman atu ameasa sé de’it. Maibé rezisténsia ne’e mosu, tanba violasaun iha ita-nia rai, violasaun kontra konstituisaun RDTL. Vandalizmu loloos ne’e mak asalta podér iha PN. Viola ita-nia konstituisaun, tanba ne’e mak ita hakarak hadia. Grupu RNDJK RDTL sei tun ba munisípiu 13 atu prepara populasaun sira atu hasoru kualker momentu”, esplika Ângela Freitas ba jornalista sira liu husi konferénsia ba imprensa, Kuarta (2/9/2020), iha ninia rezidénsia Bairu Formoza, Díli.
Porta-Voz Grupu RNDJK RDTL, Ângela Freitas, hato’o kestaun ne’e, hodi responde preokupasaun deputadu bankada FRETILIN, PLP no KHUNTO ne’ebé akuza katak, massa husi grupu RNDJK sei lori kilat iha manifestasaun, no grupu refere konsidera hanesan vandalizmu.
Antes ne’e mós grupu husi forsa armada FALINTIL-Forsa Defeza Timor-Leste (F-FDTL), kaer kilat boot, uza máskara, taka oin metin halo serku ba rezidénsia Porta-Voz RNDJK, Ângela Freitas.
Antes ne’e, iha dia 19, fulan Maiu, tinan ne’e, mosu istória “moruk ida” iha Estadu Direitu Demokrátiku Timor-Leste iha ne’ebé deputadu husi bankada tolu hanesan FRETILIN, PLP, KHUNTO, halo asaltu ba meja PN, hodi troka tiha Prezidente Arão Noe Amaral no bankada CNRT la fó fatin, tanba tuir CNRT bankada tolu ne’e viola maka’as rejimentu PN no konstituisaun RDTL, maibé CNRT nia defeza ba konstituisaun ho rejimentu PN ne’e la importa husi bankada tolu, tanba bankada tolu ne’e “lufu-lafu” halo ona plenária iha ne’ebé prezidente atuál la tau iha ajenda destituisaun ba plenária, nune’e ikus mai mosu barullu maka’as iha PN hodi rezulta meja PN hotu rahun, nune’e konsege hili duni Aniceto Guterres husi bankada FRETILIN ba Prezidente PN. avi
