Forum Organizasaun Naun Govermentál Timor-Leste (FONGTIL) hamutuk ho parseiru sira kontinua halo diskusaun, hodi kria modelu auditoria sosiál foun ne’ebé envolve direta komunidade ba programa tinan 2021.
Auditoria sosiál mak prosesu ne’ebé apoiu sidadaun sira hodi monitoriza ba prestasaun servisu Governu, atu garante dezenvolvimentu nasionál hanesan saúde, edukasaun, agrikultura no infraestrutura báziku fó benefísiu ba ema hotu.
“Antes ne’e NGO mak halo no komunidade hanesan fornese dadus depois NGO kontinua lori dadus halo advokásia, maibé agora ita hakarak muda oinsa modelu ida ne’ebé komunidade iha suku no aldeia sira mak halo auditoria sosiál no NGO book-an iha oinsa fó kapasitasaun ba komunidade, NGO ajuda kanaliza dadus ba governante sira no modelu ida ne’e mak ita nia diskusaun no sei dezenvolve matadalan auditoria sosiál ne’ebé halo husi komunidade no implementa iha tinan 2021”, Diretór Ezekutivu FONGTIL, Daniel Santos do Carmo, iha salaun Paroquial São José Catedral-Díli, Segunda (28-09-2020).
Koordenadór Timor-Leste Coalition for Education (TLCE), José Monteiro, hateten, liu husi auditoria sosiál ne’e konsege identifika problema oin-oin iha setór edukasaun hanesan merende eskolár, kuríkulu edukasaun, infraestrutura eskola, inklui kualidade profesór.
“Iha 2019 ita halo auditoria sosiál ba formasaun profesór iha munisipiu 13 no deskobre katak maioria profesór Timor-Leste, liu-liu iha ensinu báziku nia kapasidade ba lian Portugés foin iha nivál A2, signifika foin báziku, nune’e rekomenda ba Institutu Nasionál Formasaun Dosente no Profisionál Edukasaun (INFORDEPE), hodi hasae liu tan formasaun sira rekoñese katak maioria profesór sira ne’e rekruta sira nia-an mesak, la liu husi formasaun ruma”, tenik Koordenadór TLCE ne’e.
José deklara, durante ne’e INFORDEPE rasik iha problema hanesan orsamentu ne’ebé aloka husi Ministériu Edukasaun mínimu, nune’e la konsege bele apoiu formasaun ba profesór iha teritóriu laran tomak.
Koordenadora Unidade Auditoria Sosiál–Gabinete Primeiru Ministru (PM), Sonia Leite, garante Governu sei kontinua apoiu servisu sosiedade sivíl, tanba rezultadu auditoria sosiál tulun Governu hodi foti desizaun.
Entretantu Governu liu husi Gabinete PM apoiu ona orsamentu USD 500.000 ba programa auditoria sosiál tinan 2019 ba organizasaun 11, maibé ba tinan 2020 orsamentu refere sei iha faze diskusaun. ida
