Xefe Suku Madohi, Bernardino de Cristo Ferreira, konsidera, prezensa grupu Rin Besi Asu Tali Be Korente iha Madohi, ilegál.
Tuir informasaun ne’ebé mak Xefe Suku Madohi, Bernardino de Cristo Ferreira hetan husi grupu Rin Besi Asu Tali Be Korente katak, grupu refere nia prezensa hodi partisipa komemorasaun loron konsulta popular 30 Agostu de’it, hafoin sira ne’e bele namkari, maibé to’o ohin loron grupu Rin Besi Asu Tali Be Korente, kontinua mantein iha Aldeia Naroman, Suku Madohi, Postu Administrátivu Dom Aleixo, Munisípiu Díli.
Tanba ne’e, Xefe Suku, Bernardino de Cristo Ferreira, konsidera grupu ne’e nia prezensa ilegál no sei informa ba Polísia hodi hasai grupu Rin Besi Asu Tali Be Korente husi Madohi.
“Momentu ne’e ami deskonfia, tanba situasaun polítika ne’ebé la’o iha rai-laran em relasaun ho petisaun maun António Ai-Tahan Matak ho mana Ângela Freitas, entaun ha’u rasik Xefe Suku preokupa to’o duni iha ne’ebá, sira dehan la’os ida ne’e, sira fó koñesimentu mai ha’u ne’e dia nasionál ne’e sira tenke partisipa, maibé COVID-19 la fó dalan atu halo movimentu boot, diak liu prevene-an, maibé to’o agora sei eziste hela. Tuir loloos ne’e dia 30 ne’e sira fila ona, porque ita laiha meuis ida admite atu halo komemorasaun. Agora sé laiha ona tempu ita halo komemorasaun secara nasionál, diak liu fila rasik. Tuir loloos sira fila, sé la fila Polísia mai fó hatene sira fila. Sé nafatin iha ne’e labele, orsida ida hetan demokrasia, ida seluk labele hetan demokrasia, entaun problema ida. Partisipasaun iha dia 30 Agostu ne’e la’os ilegál, mas liu ona, ita kompara oinsá. Ne’e konsidera hanesan ilegál tiha ona”, esplika Xefe Suku Madohi ne’e ba GMN Kinta (10/09/20), iha iha nia rezidénsia Madohi Díli.
Grupu Rin Besi Asu Tali Be Korente iha Madohi, lidera husi Vicente da Silva, ho ema mai husi munisípiu Baucau hamutuk tolu nulu resin, kada loron ema sira ne’e sempre halo movimentu husi Baucau mai Díli.
GMN tenta atu halo konfirmasaun ho Vicente da Silva, núdar Prezidente ba grupu Rin Besi Asu Tali Be Korente, maibé rejeita fó informasaun. avi
