Kandidatu traballadora Timor-oan ida ne’ebé atu ba servisu iha Austrália baku malu ho funsionáriu Sekretaria Estadu Formasaun Profísional no Empregu (SEFOPE), tanba dezkontente simu rezultadu teste ne’ebé iha.
“Ha’u lamenta no emosi hodi rakut malu ho mana ne’e, tamba sistema ne’ebé implementa ne’e ami la simu no ami deskonfia sistema ne’e sira aplika sistema familiarizmu, tanba kriteria mak mane bomba rai to’o 30 no ami feto sira dala 15, maibé na realidade balun bomba rai la to’o 15 no dala 8 de’it bele liu, ami sira be halo dala 10 mós bertahan sei halo nafatin ami la liu fali, depois mai koalia barak fali no seolah-olah goza fali ami obriga ami fila ba uma ona”, tenik kandidata traballadora Austrália, Adelina Bisoi Soares.
Akontesimentu ne'e mosu bainhira SEFOPE hala’o teste fíziku ba kandidatu traballadór sazonal sira husi munisípiu Díli iha Akademia Polisia Comoro, Segunda (21/09/2020).
Adelina ne'ebé la pasa iha teste ne'e hateten, nia sente hirus hodi rakut malu ho funsionáriu SEFOPE, tamba la simu liafuan balun ne’ebé hasai husi funsionáriu refere.
Alende ne'e, kandidatu traballadór sira ba Austrália lamenta kriteria ne’ebé SEFOPE implementa, tamba teste ne’e hanesan atu sai membru F-FDTL ho PNTL ninia.
“Ami la simu kriteria sira ne’e, tamba ami teste fiziku ida ne’ebé hanesan ami atu sai membru F-FDTL ho PNTL ne’e, a final ami ba ne’e ba servisu ku’u ai-fuan, la’os ba kaer kilat hodi hasoru nasaun Austrália ne’e lae, importante mak ami liu ona teste saúde no ami tenke hatene lian Ingles, la’os atu ba bomba rai, tamba ne’e ami husu ba SEFOPE atu muda sistema ne’e iha futuru”, Kandidatu traballadór Austrália, Abrão da Conceição.
Kona-bá asuntu ne'e, Diretór Diresaun Nasional Empregu Exterior, Filomeno Soares, hateten, kriteria ne’ebé SEFOPE implementa ba kandidatu sira mak mane bomba rai dala tolu nulu no feto dala sanulu resin lima.
Kandidatu traballadór sazonal ba Austrália hirak ne’ebé la liu ne’e, tamba sira la konsege bomba rai tuir kriteria ne'ebe estabelese ona.
Hafoin liu ezersísiu fíziku ne’e, sei kontinua ho teste halai no faze datoluk mak teste lian Ingles.
Kandidatu traballadór sazonal ba Austrália iha munisípiu Díli hamutuk 3174 no husi númeru ne’e kandidatu teste ba loron dahuluk ne’e kuaze 200 resin mak la liu no sei iha teste ba faze daruak iha Tersa Feira ne’e.
Entretantu, dau-daun ne’e Timor-oan ne’ebé mak servisu iha Austrália hamutuk rihun ida atus ida resin. tos
