Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Falur Rate Laek, husu ba matenek na'in sira atu banati tuir asaun karidade ne’ebé líder karismátiku, Kay Rala Xanana Gusmão halo.
Lia hirak ne'e Vise Xefe Estadu Maiór Jenerál F-FDTL, Falur Rate Laek hato'o, bainhira akompaña líder karismátiku, Kay Rala Xanana Gusmão, halo asaun karidade iha bairu Wek-Fia, Postu Administrativu Lakluta, Munisípiu Viqueque.
Vise Xefe Estadu Maiór Jenerál F-FDTL ne'e rekoñese hahalok ne'ebé Xanana halo hanesan masin ne'ebé matenek na’in sira tenke halo tuir, nune'e bele ukun rai ne'e ho di'ak no la hamosu hanoin kontra malu.
“Hahalok Maun Xanana nian ne’e sai hanesan masin, para peregrinasaun ema sira ne’ebé aban-bainrua ukun rai ida ne’e serví nasaun ida ne’e, povu ida ne’e. Ha’u mos agradese ba ekipa ne’ebé la’o hamutuk ho Maun Bo’ot Xanana, depois maun bo’ot na’in rua tama tan (José Ramos Horta ho José Luis Guterres) ho sira seluk nia apoiu materiál, pesoál, apoiu morál mak ita bo’ot bele mai to’o iha fatin ida ne’e, tanba fatin ida ne’e uluk kedas ema hein ita bo’ot sira, hein katak hahalok ida ne’e hanesan masin, habelar ba. Ha’u kaer fali Administrador Dilor nia liafuan katak, haksolok. Haksolok hanesan ita sei la kontra malu tun-sa’e, ita sei la hirus malu”, afirma Vise Xefe Estadu Maiór Jenerál F-FDTL, Falur Rate Laek.
Bainhira to'o iha Bairru Wek-Fia, Postu Lakluta, Komunidade iha fatin refere simu Xanana Gusmão ho nia ekipa, ho entusiasmu maka’as.
Hanesan mós iha fatin seluk, iha fatin refere, Xanana Gusmão kontinua halo asaun karidade hodi distribui nesesidade bázika ba ferik katuas no mos ba kbiit laek sira. GMN
