Klibur Defisiénsia Tilun Timor-Leste (KDT-TL) produz ona formandu na’in 10 ba programa formasaun lian jestuál ne’ebé tuir ona formasaun durante fulan sia (9) nia laran.
Sekretáriu Estadu Komunikasaun Sosiál (SEKOMS), Mericio Juvinal dos Reis “Akara”, apelu ba foinsa’e sira atu aprende lian jestuál, hodi tulun belun sira ho défisiénsia tilun bele asesu ba informasaun.
“Ha’u akompaña iha prosesu tékniku sira la’o di’ak no bele prátika ne’ebé prosesu ne’e bele kontinua agora konsege forma ona ema na’in 10 no bele dehan ema aumenta tan no ha’u hakarak husu atu bele ba tan munisípiu sira, tanba maluk defisiénsia barak”, SEKOMS ne’e iha edifísiu KDT-TL Matadoru-Díli, Sesta (18-09-2020).
Xefe Departamentu Edukasaun Inkluzivu, José Monteiro, informa, dau-daun ne’e Governu iha ona planu ba tinan 2020-2024 integradu ona bazeia ba Planu Estratéjiku Dezenvolvimentu Nasionál (PEDN) ba tinan 2011-2030 sei asegura sira hotu, liu-liu sira ne’ebé defisiénsia tilun.
“Ita sei halo formasaun liu husi lingua jestuál ME iha ona susesu boot ida mak ita iha formadór 100 ba edukasaun inkluzivu iha munisípiu 9, inklui RAEOA no husi formadór sira ne’e ita sei reforsa liu tan ba área bryel no mós ba lingua jestuál”.
Diretóra KDT-TL, Crescencia Madeira de Deus, hateten, sei kontinua loke formasaun hanesan iha munisípiu sira seluk, tanba númeru ema ho defisiénsia iha teritóriu laran kuaze rihun 12.
Iha difikuldade barak ba ema ho defisiénsia tilun hasoru mak la asesu ba edukasaun, saúde no selu-seluk tan, tanba laiha tradutór lian jestuál.
Nune’e husu ba Governu atu suporta nafatin organizasaun, atu nune’e bele asesu ba informasaun hotu, espesiál tau tradutór iha televizaun.
Formandu Lian Jestuál, Acacio Barros mós iha motivasaun rasik hakarak aprende lian jestuál, tanba iha fuan boot, iha solidaridade ba maluk defisiénsia tilun sira hotu, ho motivasaun sira ne’e mak enkoraja atu badinas aprende lian jestuál, hodi tulun sira iha situasaun no kondisaun ne’ebé sira enfrenta.
Entretantu formasaun ne’e rasik hetan apoiu orsamentu USD rihun 6 resin husi SEOKMS no apoiu tékniku husi organizasaun defisiénsia sira seluk, atu bele fasilita fatin ba formadór sira.
Entantu dau-daun ne’e númeru formandu iha KDT-TL aumenta ba 60 resin. ida
