Organizasaun rezisténsia Sagrada Família (SF), kondena aktu husi grupu Rezisténsia Nasionál Defende Justisa no Konstituisaun (RNDJK) RDTL, tanba fó ultimatu ba Estadu no tentativa atu hadau poder.
“Organizasaun rezisténsia Sagrada Família liu husi Grupu Makikit Lemorai kondena hahalok bajuladór sira ne’e rekoñese katak kultura krítika no autokrítika no kontrola sosiál presiza haburas iha ita-nia rai, sidadaun hotu iha direitu ba liberdade reuniaun no manifestasaun ho dalan evita kro’at ho violénsia. Maske sidadaun hotu iha direitu hato’o mensajen krítika, bele hato’o liu husi karta petisaun protestu no asaun pasífika hasoru ukun-na’in sira, maibé la’ós fó fali ultimatu ba Estadu ho tentativa golpe hadau poder”, Porta Voz Organizasaun rezisténsia SF, Romeo Verdial liu husi konferénsia ba imprensa iha Fatuhada Díli, Sesta (11-09-2020).
Tanba ne’e, Grupu Makikit Lemorai husu ba grupu RNDJK atu respeita no valoriza veretanu sira, tanba ho sira mak Timor-Leste ohin loron bele ukun-an no la merese atu hasai liafuan fahi ne’ebé reflete ba animál, hodi prega ba veteranu sira.
“Ami preokupa grupu RNDJK nia deklarasaun ba públiku iha elementu F-FDTL ho PNTL balun mós envolve iha grupu refere. Afirmasaun ne’e sei ameasa ba Estadu, ho nune’e ami insisti ba komandu instituisaun rua ne’e urjénsia atu bolu Porta Voz RNDJK, Ángela Freitas ho António Ai-Tahan Matak, hodi justifika no aprezenta dadus kona-bá elementu envolve sira“, tenik Romeo.
Antes ne’e, grupu RNDJ RDTL, Ângela Freitas ho nia ekipa atu realiza manifestasaun kontra Estadu iha loron 4, fulan Setembru, tinan ne’e, iha Tasi-Tolu, postu administrativu, Dom Aleixo, munisípiu Díli.
Maibé, iha loron 1, fulan Setembru ne’e, membru F-FDTL hala’o vijilánsia másimu iha rezidénsia Ângela Freitas, iha Bairo Formosa-Díli.
Tuir planu, iha tempu besik grupu RNDJ RDTL ne’ebé lidera husi Porta Voz, Ângela Freitas sei realiza manifestasaun, hodi kontra Xefe Estadu. ety
