Ofisial Ligasaun Instituisaun no Advokasia Asian Justice and Rights (AJAR), Inocençio de Jesus Xavier, hatete, Governu badinas halo rezolusaun hodi sulan povu, maibé la hatene kria kondisaun.
Nia hatete, situasaun atuál afeta tebes ba nesesidade kada uma-kain, tanba barak lakon servisu, empreza suspende atividade hotu, negosiante sira hetan rendimentu kiik liu, tanba laiha sirkulasaun osan.
“Badinas de’it halo rezolusaun sulan ema, mais sulan mós tenke hatene fó han, hatene responzabiliza, ida ne’e mak importante, tanba ita limita ona ema nia liberdade. Timor-Leste la’os ema hotu-hotu Funsionáriu Públiku, balu kbi’it la’ek, susar atu hetan hahán, ne’ebé presija apoiu,” kestiona Inocençio, iha nia knaar fatin, Faról-Díli Kinta (02/09).
Kona-ba apoiu rekoperasaun ekonómika durante pandemia COVID-19, Governu aloka millaun USD 71.5, hahú iha fulan Novembru no Dezembru tinan 2020, ne’ebé implementa ba Munisípiu 12 no RAEOA.
Programa sesta bázika ne’e termina ona iha tinan 2021 ne’e, tanba ejekusaun osan ba programa ne’e atinje porsentu 100.
Tanba ne’e AJAR konsidera, lolos programa ne’e tenke iha kontinuasaun, tanba Governu mós mantein medida rigurozu hodi bandu sirkulasaun ema nian.
“Ami durante observa ne’e Governu iha de’it meius ba prevensaun atu ema labele moras ba COVID-19, mais Governu haluha katak ema hamlaha mós bele mate, tanba ne’e Governu labele serka ema, obriga ema, hela iha uma, mais Governu la kria kondisaun” tenik nia.
Reuniaun Konsellu Ministru, semana ne’e, deside renova KDJ iha Múnisipiu Díli, ba loron 7 tan, ne’ebé tama vigór iha loron 3 no sei remata iha loron 9, fulan Setembru tinan ne’e.Ags
