Ofisial Ligasaun Instituisaun no Advokasia AJAR, Inocençio de Jesus Xavier, hatete, Primeiru Ministru (PM), Taur Matan Ruak, la konsistente ho nia promesa perante públiku, tanba ne’e sei fó implikasaun bo’ot ba povu sei la ba vasina tan.
“Susar atu atinji vasina kompletu 70% ba leten, tanba agora hanesan ne’e, Primeiru Ministru hateten ema vasina dala rua la’o lívre, maibé agora laiha, vasina dala-rua mós la la’o livre,”dehan Inocençio Xavier, iha nia knaar fatin Faról-Díli, Kinta (02/09), relasiona ho deklarasaun PM Taur nian ne’ebé promete ba povu katak, vasina kompleta sei halo movimentu livre iha territóriu nasionál, maibe realidade “bosok”deit povu.
Medida Konfinamentu Domisiliáriu Jerál (KDJ) ne’ebé Governu aplika, bandu sidadaun ne’ebé simu ona vasina doze kompleta atu labele movimentu lívre.
Observasaun sosiedade sivíl nian durante ne’e nota, kuaze sidadaun barak ba simu vasina, tanba atu la’o lívre iha rai-laran, no la’ós tanba tauk corona vírus.
“Ema hotu-hotu hakarak vasina ne’e, la’os tanba tauk corona vírus ne’e, tanba ema hakarak halo movimentu lívre ba Múnisipiu,”afirma.
Atualizasaun dadus husi Sentru Integradu Jestaun Krize (SIJK) hatudu, sidadaun sira ne’ebe simu ona vasina doze dahuluk atinje ona posentu 51,9 no doze daruak atinje ona porsentu 26,6.Ags
