Konsellu Kombatente Libertasaun Nasionál (KKLN) suspende veteranu ho naran inisiál BG nia pensaun kada fulan, tanba veteranu ne’e tama sai ilegalmente iha fronteira Timor-Leste (TL) ho Indonézia.
“Foin lalais ne’e hau simu telefone husi ita nia Maijor Jeneral Falur katak, iha veteranu ida hamutuk ho ita-nia artemarsiais sira tama ilegál, la hatene ba hasai sintu ka ba halo saida, ita la hatene. Ami rona ida ne’e Prezidente Konsellu Veteranu halo surat ida hodi hatama ba ministériu liu husi inspetoria jerál para kansela nia osan, para atu kansela nia osan pensaun nia labele simu hodi hein prosesu ne’e la’o” informa prezidente KKLN, Vidal de Jesus ‘Riak Leman’, iha nia knaar fatin, Caicoli Kinta (02/09).
Nia hatete, lolos veteranu mak tenke fó ezemplu ba ema hotu, hodi kumpri rezolusaun no lei ne’ebé Estadu estabelese. No apela mós ba konsellu veteranu hotu iha Munisípiu sira atu kontrola veteranu sira, labele hakat fronteira ilegál.
“Lei sira dehan katak, labele tama sai ilegál iha faronteira ba indonezia hanesan mós husi Indonézia mai Timor-Leste, tanba oras ne’e ema hotu atrapalla ho COVID ida ne’e” tenik nia.Tos
