Forum Organizasaun Naun Governamentál Timor-Leste (FONGTIL), hatete, deslokasaun Prezidente Parlamentu Nasionál (PPN) ho nia ekipa ba Áustria ne’e, konsidera krime dezobedensia.
Tanba tuir sosiedade sivíl, medida Konfinamentu Domisiliáriu Jerál (KDJ) ne’ebé Governu impoen, la’os vale deit ba sidadaun bai-bain, maibé vale ba ema hotu.
“Viajen ekipa Parlamentu Nasionál ne’e, ami konsidera hanesan krime desobedénsia, entaun ita husu PNTL atu justu halo aplikasaun tuir regra sira, Konfinamentu Obrigatóriu no Serka Sanitária ba ukun na’in sira, liu-liu ba ekipa ne’ebé mak ba estrajeiru, sira desobedensia ba regra KO ne’ebé aplika iha Díli, tanba sira mós hela iha Díli,” kestiona Diretór Ezekutivu FONGTIL, Daniel dos Santos Carmo, iha nia knaar fatin, Caicoli, Díli (06/09).
Enkuantu medida sira hatúr iha rezolusaun Governu 119/2021, haktuir iha númeru 12 kona-ba, autoridade seguransa tenke fiskaliza regra sira ne’ebé Governu impoen, no se deit mak la kumpre rezolusaun ne’e konsidera krime dezobediénsia (Kódigu Penál, artigu 244).
Kona-ba ekipa PPN ne’ebé aranka ona ba Áustria deskonfia balu pozitivu COVID-19, organizasaun naun governamentál ne’e sujere Polísia Sintífika Investigasaun Kriminál (PCIC-sígla portgés) tenke halo investigasaun.
“Se ida ne’e los, ita nia sujestaun mak husu ba PCIC atu halo investigasaun, se iha duni ekipa balu pozitivu” tenik Daniel.
Desizaun PN nian ba partisipa iha eventu ne’e, la nesesáriu, tanba gasta rekursu Estadu nian, mesmu sira hatene hela katak, povu hasoru hela difikuldade ekonomia.
“PPN laiha sensibilidade tanba mundu agora ne’e, aplika hela uza mekanismu online, ba enkontru importante sira, ne’ebé nasaun hotu-hotu bele partisipa, maibé tanba sa mak tenke enkontru direita” hakotu.Ags
