GMN TV Sosiedade Subsídiu ba FP, hanesan insultu boot ba povu

Subsídiu ba FP, hanesan insultu boot ba povu

379 views

Diretór Ezekutivu Sentru Estudu ba Paz no Dezenvolvimentu (CEPAD-sígla portugés), João Boavida, hatete karik Prezidente Repúblika (PR) aprova projetu Dekretu-Lei subsídiu mensál ba Funsionáriu Públiku (FP) maka ida ne’e, hanesan insultu boot ba povu Timor tomak.

“Se Prezidente aprova, hau hanoin ida ne’e insultu ida ba povu Timor tomak, tanba deit saida? Tanba deit subsídiu kuandu mosu tenki benefísia interese públiku nian, subsidiu ba Funsionáriu Públiku iha situasaun sira krítiku agora, interese públiku nian iha ne’ebé? Ita liga interese públiku ho interese sira privilejiadu iha sistema ida ne’e nia laran hanesan FP, iha ne’ebé? Embora iha kabementu, tanba aprova iha 2019, so que Governu la sensitivu ba sofrementu povu nian e hakarak aprova fali iha situasaun agora,” dehan Diretór CEPAD ne’e, liu husi programa Garde Entrevista, iha GMN-TV, Bebora Díli Kinta (23/09).

Nia konsidera iha COVID-19, ho nia impaktu negativu ba povu tanba limite movimentu atu buka moris susar tebes, tanba ho restrisaun ba movimentu, Estadu Emerjénsia, Serka Sanitária no Konfinamentu Obrigatóriu.

“Hau hanoin Governu maka la sensitivu ba situasaun em termus sofrementu povu nian iha situasaun espesifiku ida ne’e” dehan.

Diretór ne’e sujere Governu presiza hases polítika no sensitivu ba situasaun, hodi akompaña terus povu nian, atu labele kaer fali proposta ida ne’ebé Komisaun Funsaun Públika hasai iha tinan 2019 atu tau ba implementasaun iha tinan 2021.

Governu iha referénsia barak iha rejime nasaun seluk nian, maka Governu jeralmente aproveita situasaun krize, situasaun konfuzaun, buat sira ne’e hotu atu avansa ho buat ne’ebé atu sai instrumentu polítiku hodi mantein poder polítiku.

“Hela fulan tolu deit atu tinan fiskal remata, ida mós ita hela fulan lima atu tama eleisaun prezidensiál, pergunta maka ne’e, tanba sa Governu agora hakarak tebtebes aprova lei ida ne’ebé Komisaun Funsaun Públika aprova iha 2019? Ida ne’e pergunta ida ne’ebé tenki iha resposta husi Governu,” nia dúvida.

Hatán kona-ba subsídiu ai-han ne’e atu motiva agrikultór sira kultiva barak liu tan atu bele prodúz iha rai laran, iha lójika ka lae? Nia Diretór CEPAD hatán iha lójika, “tanba atu sosa foos iha rai laran, maibé husi esperiénsia Timor nian, ita sempre sosa foos husi Vietnam, ida ne’e deit kestaun seluk ona ne’ebé ita presiza tau matan” hakotu.GMN


Banner

Foto

Notisia Ikus

PN kestiona PolTranz “falla”, Komandante PolTranz husu Deskulpa

October 15, 2021
Parlamentu Nasional (PN) liu husi Deputadu Komis...

Posibilidade CNRT sei la akompaña Governu hala'o kampaña vasinasaun

October 15, 2021
Deputadu sira iha Parlamentu Nasionál (PN) ohin...

Ohin, Governu aprezenta OJE 2022 ba PN

October 15, 2021
Governu aprezenta Orsamentu Jerál Estadu (OJE) ...

Governu kontinua “alerta” FP la vasina, sei la tama servisu

October 14, 2021
Ministru Prezidensia Konsellu Ministru, Fidelis ...

SEAKLN “defende” veteranu la impede dezenvolvimentu

October 14, 2021
Sekretáriu Estadu Asuntu Kombatentes Libertasau...
1 2 3 652

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker