Autoridade Munisípal Díli (AMD) sei la sosa tan kareta ba nesesidade tula lixu nian, tanba jestaun lixu sei entrega ba setór privadu sira mak sei jere.
Prezidente Autoridade Munisípiu Díli, Gaspar Soares, hateten, autoridade Munisípiu Díli (AMD) ba tinan 2019, laiha planu atu sosa tan kareta kamioneta foun hodi raut foer iha kapital Díli ho razaun katak Governu atu entrega ona lixu ne’e ba setór privadu mak jere.
“Governu laiha planu atu sosa kareta kamioneta foun raut foer nian, tanba ne’e mak la propoin ba orsamentu 2019 nian tanba atu entrega lixu ba kompañia privadu ne’e bazeia dekretu lei númeru 32/2016, ne’ebé agora hein hela prosesu aprovizionamentu”, hateten Prezidente Autoridade Munisípiu Díli, Gaspar Soares, ba GMN iha nia knaar fatin Matadoru, Díli, Segunda (29/10).
Autoridade Munisípiu Díli agora iha kareta ualu, maibe ha’at de’it mak hala’o operasaun, no ha’at seluk aat tia ona, ne’ebé to’o agora sedauk hadia.
“Seidauk hadia tanba orsamentu seidauk iha no antes ne’e mos Governu aluga kareta 40 hodi raut lixu iha kapital Díli, maibe tinan oin Governu sei la aluga tan kareta tanba intrega ona lixu ba setór privadu sira mak sei jere, tanba ne’e Governu halo de’it kontrolu”,hateten Gaspar Soares.aba
