Kandidatu traballador sira husi Munisípiu Lautém, Postu Administrativu Lospalos, Suku Fuiluru, halo asaun protestu hasoru Sekretária Estadu Formasaun Profissional no Empregu, relasiona ho sistema rekrutamentu traballador ba Australia ne’ebé deskonfia iha irregularidade.
Hatan ba kestaun ne’e, Sekretáriu Estadu Formasaun Profissional no Empregu, Julião da Silva, rekoñese iha duni demonstrasaun husi kandidatu trabalhador sira ba Australia iha Munisípiu Lautem, tanba deskonfia mosu iregularidade.
“Kandidatu sira atu ba Australia ne’ebé tuir teste ne’e mai demonstra tanba lá sastisfas ba prosesu ne’ebé mak ekipa sira hala’o iha munisípiu Lautem, maibe tuir ha’u nia deskonfia deit karik dalaruma sira lá sastifas ho joven sira ne’ebé munisípiu mos Lautem, maibe hela iha Díli tuir teste iha ne’eba depois liu”,hateten, Julião da Silva, ba JN-Diário, iha nia knaar fatin, Caicoli-Dili, Segunda (22/10/2018).
Julião da Silva esplika, teste ba kandidatu sira la’os konfidensial, maibe aberta ba públiku.
“Teste dala ida ema nain 10 to’o 20 mak teste dala ida ne’ebé sira hatene malu ida ne’ebé liu, lá liu, demonstra lá satisfasaun ho prosesu sira ne’e, ne’e normal iha fatin hotu-hotu”,dehan nia.
Teste husi ekipa SEFOPE nian hala’o ba kandidatu sira ne’e mak hanesan, teste eskrita ho lian inglés no mós teste fíziku.
Kandidatu ne’ebé pasa ona iha teste ne’e sei tama iha lista no hein merkadu husi kompañia Australia.
Tuir kompromisu Australia ho Timor-Leste, tenke priense ema 1.500 kada tinan.
Lista ne’ebé mak oras ne’e SEFOPE iha, traballador Timor-oan, ne’ebé mak servisu iha nasaun Australia hamutuk ema nain 3.000 resin.Eus
