Kordenadora Seguransa Hospital Nacional Guido Valadares (HNGV), Tereza Belo, lamenta ho atitude negosiente ne’ebé kontinua fa’an sasan iha areadores hospital.
Tereza Belo, lamenta tebes ho situasaun ne’e tanba alende halo imajen HNGV foer, ho prezensa negósiu kiik no dala barak impede movimentu transporte.
“Ita hotu hatene katak lolos ne’e Komisaun Avaliasaun Investigasaun Auditoria Inspesaun (KAIAI-HNGV), hasai ona sirkular ida katak la autoriza kualker ema ida atu fa’an sasan iha area HNGV nian tantu aifuan, tantu pulsa no nasi kotak mas realidade sira sei fa’an ida ne’e KAIAI sei tuur hamutuk hodi koalia fila fali attitude ida ne’e tanba HNGV ne’e fatin atu ema mai halo tratamentu no fo tratamentu ba moras oi-oin tanba ne’e labele fa’an sasan iha ne’e”,hateten Tereza Belo ba GMN, iha HNGV Bidau, Díli, Segunda (29/10/2018).
Tereza haktuir, HNGV la’os sentru saúde maibe hospital top ne’ebé la’os sidadaun Timor oan de’it mak halo tratamentu maibe mos sidadaun estranjeiru mos mai halo tratamentu saúde, tanba ne’e bandu atu negosiante kiik sira labele fa’an sasan hanesan mensiona ona iha leten iha area HNGV tanba alende hafoer imajen HNGV, ho atividade negósiu ida ne’e mos dala barak hamosu engrafamentu.
“Hospital ida ne’e loron-loron ema sempre mai vizita hodi halo tratamentu ne’ebé mai husi sidadaun husi nasaun oi-oin, KAIAI sei tuur hamutuk fila fali hodi foti desizaun ba ida ne’e tanba ita fo ona sirkulasaun maibe sira mak la kumpri”,Tereza hateten.
Entretantu Luis Bareto nu’udar negosante, deklara, sei mai fa’an hudi iha HNGV tanba seidauk iha informasaun kona ba sirkulasaun ne’ebé mak HNGV hasai katak bandu labele fa’an sasan iha areadores hospital.
“Ha’u sei mai fa’an hudi iha ne’e tanba ha’u lahatene katak ema iha ne’e bandu, ha’u seidauk iha informasaun kona ba ida ne’e”,Luis Bareto promote.
Antes ne’e Hospital Nasional Guido Valadares, liu husi Komisaun Avaliasaun Investigasaun Auditoria Inspesaun, hasai ona sirkulasaun ho númeru referensia 17 katak la autoriza ema ida atu halo kualker negósiu iha Enfermaria laran nomos iha liur, mak hanesan pulsa telemovel, nasi kotak, aifuan no seluk tan.Ola
