Xefe Departementu Abastesimentu Agua Díli, Francisco Xavier Pereira, hateten, oras ne’e dada’uk diresaun operasional abastesimentu operasional ba bee moos infrenta falta kombustivel.
Tanba ne’e, sei difikulta servisu operasional iha terenu, hodi labele halo atendimentu ba komunidade ne’ebé presiza bee moos.
“Agora dadauk ami operasional Díli infrenta mina mak laiha, ne’e mak hanesan dezafiu ida ba ami hala’o servisu operasional iha terenu, hanesan ita boot sira haree kareta tanki no kareta operasional sira para dadauk iha no labele hala’o servisu tanba mina laiha”,dehan, Francisco Xavier Pereira ba JN-Diário iha nia knaar fatin, Caicoli-Díli, Tersa (30/10/2018).
Xefe departementu ne’e hatutan katak, ho dezafiu ne’ebé iha parte diresaun labele halo atendimentu ba keisa ruma husi komunidade liu-liu kestaun bee moos ninian.
Nia aprofunda katak, atendimentu emerjensia ruma mos labele halo atendimentu ho problema ne’ebé mak iha.
“Semana ida liu ba sira fo mina oituan ba atendimentu emerjensia nian, agora dadauk ne’e mezmu iha servisu urjentimente ami labele halo atendimentu tanba laiha lós ona”,nia heteten.
Nia esplika, mina ne’ebé diresaun ne’e ense iha ho kompañia Borala fuel, no kupon iha hela, maibe tanba razaun Governu seida’uk selu hotu entaun kompañia labele halo ona atendimentu ba diresaun ne’e.
Tanba ne’e, sai dezafiu bo’ot ba servisu manutensaun iha kapital Díli. Bee moos ne’ebé durante ne’e oferese ba komunidade sira iha Díli laran husi Abastesimentu Bee moos Benamauk, Lahane, Bee moos Comoro, Maloa.
Entretantu, Jornalista JN-Diário tenta konfirma ho Sekretáriu Jeral Ministériu Obras Públika (MOP), kona-ba asuntu laiha kombustivel ba Departementu Abastesimentu Agua Díli, maibe laiha fatin, tanba okupadu ho servisu.Eus
