Bispu Dioseze Baucau, Dom Basílio do Nascimento husu sarani sira labele tauk sunu lilin ne'ebé ho imajen Na’in Feto ho Jesus, tanba ne’e hanesan plástiku de’it.
Ho nune’e, sarani sira tenke iha konsiénsia rasik, hodi la preokupa ho relijiaun seluk nia komentáriu kona-bá sunu lilin ho imajen Na’in Feto no Jesus.
“Sarani barak foti problema ne’e ema sunu lilin liu-liu relijiaun seluk ami hamoe ami dehan ita Katóliku ne’e laloos, tanba ita sunu ita-nia Maromak, keta tau problema imi iha dalan rua, ida mak hasai tiha plástiku ne’e no hasai mós dalaruma halo foer barak tan de’it, sarani sira lalika hola ba problema boot, ita boot sira sunu karik sunu de’it ba, tanba ita boot sira la’ós sunu Nossa Senhora, maibé sunu plástiku”, Bispu Dioseze Baucau liu husi omília iha selebrasaun misa agradesimentu loron Santa Teresinha no Inagurasaun Monumentu Padre João de Deus Pires iha Parókia Santa Teresinha do Menino de Jesus, Quelicai-Baucau, Sábadu (03-10-2020).
Wainhira sarani sira lakohi sunu lilin ho imajen Nain Feto ou Jesus, entaun tenke iha rasik hanoin labele sosa lilin hanesan ne’e.
Dom Basílio mós apela ba sarani sira labele ezije igreja hodi bandu ema fa’an lilin ho illas Na’in Feto no Jesus, tanba ne’e hanesan atividade negósiu ne’ebé responsabilidade tomak mai husi Governu.
Sarani Quelicai harii monumentu João de Deus
Atu fó onra ba matebian Padre João de Deus Pires, SDB nia kontribuisaun ba luta libertasaun patria no vida relijiozu iha Timor-Leste, sarani Quelicai, munisípiu Baucau harii monumentu hodi fó onra ba matebian refere.
Bispu Dioseze Baucau, Dom Basílio do Nascimento ne'ebé prezide misa agradesimentu loron Santa Teresinha no Inagurasaun Monumentu Padre João de Deus Pires, apela ba sarani sira atu banati tuir Santa Teresinha ho Amo João nia hahalok durante sei moris.
“Ida ne'e mak Teresinha ho Amo João hanorin kona-bá vida sarani, Teresinha hakarak sai misionária hodi haklaken Maromak nia liafuan iha rai seluk, maibé haka’as nia la konsege, uma kreda foti nia sai padroeira tanba santa Teresinha hatudu katak sai misionária bele liu husi vida oin-oin, matebian Padre João hatán ba Maromak nia bolu ne’e sai duni, nia mai Timor, misaun primeiru nia dedikasaun ne'ebé gasta iha Timor, sura nia hahalok ha’u la hatene buat barak, maibé imi mak hatene liu Amo João nia domin”, Bispu Dioseze Baucau iha Parókia Santa Teresinha do Menino Jesus Quelicai, Sábadu (09-10-2020).
Serimonia ba inagurasaun monumentu ne'e hala’o hamutuk ho selebrasaun misa ba loron Santa Teresinha do Menino Jesus ne'ebé sai hanesan padroeira ba Parókia Quelicai.
Prezidente Komisaun Organizadora, Sebastião Perreira Gaio Pires, hatete, monumentu ne'e harii, tanba hetan kontribuisaun husi sarani Quelicai nia oan sira ho totál orsamentu kuaze USD 900.000 resin, inklui apoiu materiál.
“Ami tau monumentu ne’e, tanba iha sentimentu ida Quelicai nia-oan hamutuk, tanba durante ne’e avó ida ne’e mak mai harii eskola, kapela, ne’e istória boot ida, katuas ne’e la’ós mai tanba de’it relijiaun, mais haree ba kotuk naran kódigu ‘liras’ ne’e luta liu Timor, ita fó valoriza ba nia sakrifísiu”, tenik Prezidente Komisaun Organizadora ne’e.
Sarani Quelicai mós sente kontente, tanba liu husi monumetu ne'ebé harii ona bele rai hela istória ba jerasaun foun sira, tanba matebian sempre disponivel atu apoiu ema hotu.
Matebian João de Deus Pires, SDB, hanesan Padre Portugés ne'ebé halao nia misaun iha Timor, hahú husi tinan 1958 no apoiu mós ba luta ukun-an ho naran kódigu ‘Liras’ maibé iha loron 22, fulan Setembru, tinan 2019, matebian hakotu iis, tanba sofre moras komplikadu. ida
