Reitór Universidade da Paz (UNPAZ), Adolmando Amaral, hatete, Membru Parlamentu Nasionál (PN) menus kontrolu no fiskalizasaun ba ezekusaun Orsamentu Jeral Estadu (OJE) kada Ministériu, maske OJE ne’e deputadu sira mak halo apresiasaun no aprova iha PN.
“Ida ne’e mak ita nia problema, tanba bainhira Governu halo aprezentasaun OJE iha PN, deputadu sira mak halo apresiasaun no aprova molok Prezidente Repúblika (PR), Francisco Guterres Lú Olo promulga, maibé sira rasik menus kontrolu”, dehan Reitor UNPAZ, Adolmando Amaral, ba Jornalista Kinta (1/10/2020), iha Kampus UNPAZ Manleuana, Díli.
Adolmando akresenta, bainhira reprezentante povu sira halo aprovasaun ba OJE deputadu sira la haree kontiudu hosi polítika orsamentu, ne’ebé sira aprova nia lala’ok no la buka hare klean bainhira membru Governu sira ba halo aprezentasaun.
Tanba deit sira mai ho kor hanesan entaun deputadu sira apoiu deit, maibé apoiu ne’e sira rasik la hatene katak, ministériu ida ne’e iha kapasidade atu halo jestaun naton atu bele ezekuta osan ne’ebé sira aprova ka la’e, iha impaktu ba povu ka la’e no iha nia efetu ka la’e.
“Ida ne’e ita nia kauza los, tanba dalaruma ita gosta halo apresiasaun no komentariu ba programa Governu nian, maibé ita la sukat katak, kapasidade hosi ministériu ba asuntu ne’ebé ita deside, ministériu bele ezekuta OJE ne’e dentru tinan ida no bele ezekuta hotu ka lae,’ afirma akademiku UNPAZ.
Nia subliña, bainhira deputadu sira halo aprovasaun ba politika ho nia orsamentu hosi ministériu ida tenke hare kapasidade jestaun ministériu nian ba kotuk, hodi foti ida ne’e sai hanesan referensia molok halo aprovasaun ba OJE.
“Maibé membru PN sira nunka kaer referensia ministériu nian atu haree ba kotuk hodi halo deit aprovasaun, ida ne’e mak problema reprezentante povu sira nia iha PN”.
Tanba sira halo deit aprovasaun maibé la análiza kle’an katak, OJE ne’ebé aprova ho montante hanesan ne’e ba kada ministériu no ministériu bele ezekuta iha tinan ida no depois de ezekuta nia efetu ne’e saida, kapasidade ezekusaun ne’e oinsa, entaun deputadu sira presiza tetu halo diak molok halo aprovasaun. Fel
