GMN TV Sosiedade FONGTIL rekomenda pontu lima ba Governu kona-ba vasina

FONGTIL rekomenda pontu lima ba Governu kona-ba vasina

100 views

Forum Organizasaun Naun Governamentál Timor-Leste (FONGTIL) durante hala’o monitorizasaun ba dala 16 nian kona-ba kampaña vasinasaun kontra COVID-19 iha Munisípiu 12 no Rejiaun Autónomu Espesiál Oecusse Ambeno (RAEOA), deskobre pontu importante lima atu Governu bele hadi’ak tan.

Pontu importante lima ne’e mak hanesan: 1), Governu liu husi Ministériu Saúde (MS) presiza kria estratéjia diak, atu bele asegura maluk difisiente sira bele asesu ba vasina. Fundamentu sosiedade sivíl nian tuir deskobrimentu sira katak, ema ho difisiente sira nia partisipasaun sei menus, tanba ne’e tenke kria asesibilidade ba ema ho difisiente bele asesu iha programa vasinasaun ne’e.

“Iha semana ida uluk iha 35 pesoas deit mak partisipa, iha semana ida ne’e ita la haree espesifiku ema ho difisiente,” hatete Diretór Ezekutivu FONGTIL, Daniel dos Santos Carmo, iha Caicoli Segunda (11/10).

2), efetivamente tenke hasa’e tan kampaña vasinasaun ba komunidade tomak, liu-liu iha Munisípiu ne’ebé nia taxa partisipasaun sei menus hanesan Ermera, Ainaro no Bobonaro, nune’e hasa’e imunidade ema nian hasoru corona vírus; 3), mantein prezensa pesoál saúde iha sentru vasinasaun, hodi asegura no prevene impaktu negativu husi vasina, liu husi konsultasaun molok sidadaun sira ba simu vasina.

No rekomendasaun 4) nian mak hasa’e konsiénsia sidadaun nian iha fatin vasina, hodi kumpri protokolu ne’ebé Ministériu Saúde nian no Organizasaun Mundial Saúde (OMS) ne’ebé estabelese, tanba FONGTIL nota ema balu kontinua la kumpri regra sira ne’e. Pontu 5), mak haforsa koordenasaun autoridade lokál ho pesoál saúde sira nian hodi hametin diak liu tan servisu iha terrenu, nomós MS tenke monitoriza nafatin vasina sira ne’e tenke rai iha fatin ne’ebé seguru, hanesan konzeladór, liu ba Postu sira ne’ebé sempre hasoru difikuldade iha eletrisidade.

FONGTIL mós analiza katak, iha pasu pozitivu balu ne’ebé Governu konsege halo, ne’e mak sentru vasinasaun hamutuk 29 hetan kategoria di’ak los, sentru vasinasaun 13 kategoria di’ak no sentru 14 kategoria nato’on. No partisipasaun komunidade nian hahú aumenta, tanba kampaña vasinasaun Governu kontinua sosializa iha Munisípiu sira.

Atualizasaun dadus husi Sentru Integradu Jestaun Krize (SIJK) to’o loron 11, fulan ne’e hatudu, populasaun ho idade 18 ba leten simu ona vasina iha territóriu nasionál ba doze dahuluk hamutuk 486.466 reprezenta porsentu 64.4, no vasina doze daruak hamutuk 306.508 reprezenta porsentu 40.6.

No númeru vasina ne’ebé ki’ik liu mak Munisípiu Ainaro vasina doze dahuluk foin porsentu 41.4, Bobonaro porsentu 47.1 no Ermera foin mak porsentu 42.7, no Munisípiu Díli mak númeru vasina aas liu, doze dahuluk hamutuk porsentu 79.4, no doze daruak porsentu 70.2. Ba Munisípiu sira 8 seluk no RAEOA nia númeru vasinasaun husi porsentu 52 to’o 78.GMN


Banner

Foto

Notisia Ikus

PN kestiona PolTranz “falla”, Komandante PolTranz husu Deskulpa

October 15, 2021
Parlamentu Nasional (PN) liu husi Deputadu Komis...

Posibilidade CNRT sei la akompaña Governu hala'o kampaña vasinasaun

October 15, 2021
Deputadu sira iha Parlamentu Nasionál (PN) ohin...

Ohin, Governu aprezenta OJE 2022 ba PN

October 15, 2021
Governu aprezenta Orsamentu Jerál Estadu (OJE) ...

Governu kontinua “alerta” FP la vasina, sei la tama servisu

October 14, 2021
Ministru Prezidensia Konsellu Ministru, Fidelis ...

SEAKLN “defende” veteranu la impede dezenvolvimentu

October 14, 2021
Sekretáriu Estadu Asuntu Kombatentes Libertasau...
1 2 3 652

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker