Ahmad Alkatiri halo pagamentu segunda etapa ba komunidade uma kain 34 ne’ebe okupa nia rai iha Lurumata, aldeia 03 Suku Fatuhada Comoro, Postu Administrativu Dom Aleixo, Munisípiu Díli.
Domingos Serva, nudar reprezentate rain nain Ahmad Alkatiri esplika, total orsamentu ba segunda etapa ne’e hamutuk sentu kinze mil, kiñentus dolar amerikanu ba uma kain 34.
Nia rekoñese, durante negosiasaun ba pagamentu segunda etapa ne’e komunidade uma kain haat mak lakohi koopera.
“Prosesu pagamentu ba segundu etapa ne’e hanesan irmaun sira hatene, ami hetan hamutuk 34 xefi familia, sira mos simu ho diak, fo kartaun eleitoral ho diak, ami koopera diak ate ohin loron komesa ohin loron ami selu sira segunda faze nian. Ami mos labele obriga sira, sira la simu ne’e hamutuk uma kain 4, ohin loron ne’e liberdade ida-idak ho nia konsep, se ulun fatuk moruk mak aban bairua ami presiza atu halo investimentu, ne’e kazu ketak ida fali ona ita atu koalia, maibe maioria 90% ne’e hakarak sai no koopera”,informa reprezentante rai nain Ahmad Alkatiri Domingos Serva ba jornalista sira iha suku Fatuhada Díli, Segudan(19/11).
Maski nune’e komunidade balun kontinua la menta ho pagamentu segunda etapa ne’e, tanba la tuir kontratu ne’ebe rai nain halo antes ona ho komunidade sira.
Tanba iha kontratu dehan, uma piku selu empat ribu lima ratus, uma seluruh tembok selu sepuluh ribu, maibe iha pagamentu ne’ebe hala’o iha loron 19 fulan ne’e, uma piku selu deit dua ribu lima ratus no uma seluruh tembok selu de’it seribu lima ratus.
Komunidae sira konsidera, ho osan refere la too ba sira atu hola rai hodi halo fali uma foun hodi hela.
“Ita boot sira hatete kontrata ba ami oin seluk mai fali iha ne’e oin seluk, ida ne’e mak ami lakohi simu ita boot sira nia osan fo ba ami ne’e. Sira ba iha ne’ebá hatete dehan uma piku empat ribu lima ratus, uma boot delapan ribu lima ratus, seluruh sepuluh ribu, agora mai ne’e selu fali uma piku dua ribu lima ratus, uma seluruh tiga ribu lima ratus ida ne’e mak ha’u la simu,”hato’o Komunidade suku Fatuhada, Marcelina Correa Ximenes Belo.
Xefi Suku Fatuhada, Marcelino Soares hateten, nudar lider komunitáriu, sira nia funsaun mak halo komunikasaun ho parte rai nain ho komunidade atu bele hetan solusaun ba problema refere.
Maibe kona-ba prosesu pagamentu ne’e kestaun rai nain nian ho komunidade nian.
“Ami nudar sira nia líder komunitaria, primeiru estar ami simu proposta mai husi rai nain, entaun segundu oinsa mak sira bele identifika ema sira ne’ebe mak hela iha parte rai nain nia rai laran no oinsa mak sira bele sai halo komunikasaun ba malu entaun ami nia funsaun mak halo komunikaaun ba parte 2, ami kria kondisaun ba sira, konsentra sira iha fatin ne’ebe mak determina ona katak mak sede suku”,informa xefi suku Fatuhada Marcelino Soares ba jornalista sira.
Fo hanoin fali katak, antes ne’e ne’e iha fulan outuburu ahmad alkatiri mos halo pagamentu ba xefi familia hamutuk 34 ho total orsamentu 165.000 mil dolar amerikanu. ías
