Sekretáriu Jeral g7+, Helder da Costa ho nia ekipa, halo aprezentasaun iha Konsellu Ministru (KM), kona ba susesu ne’ebé mak g7+ halo ona ba nasaun konflitu sira iha mundu.
Sekretariadu g7+ hetan konvite husi Governu, hadi halo aprezentasaun kona ba servisu ne’ebé g7+ halo tiha ona durante ne’e, iha nivel internasionál no nasionál.
Sekretáriu Jeral g7+, Helder da Costa hateten, g7+ nia servisu durante ne’e, promove paz no harii Estadu iha nivel global, atu bele projeta nafatin Timor Leste nia mensajen no nia imajen ba mundu internasional, no mundu internasional rekuñese Timor Leste nia papel kona ba paz iha mundu.
“Ita hatene katak, g7+ ne’e hanesan organizasaun ida intergovernamental, ne’ebé kompostu husi nasaun 20, ne’ebé ohin loron hetan rekuñesementu bo’ot husi mundu internasional ba Timor Leste nia papel. Ha’u hakarak hatete ba ita bo’ot sira katak, ohin ami halo aprezentasaun ba Konsellu Ministru, no Konsellu Ministru apresia tebes kona ba g7+ nian servisu, no husu atu hala’o nafatin servisu diak sira ne’e ba oin”,relata Helder da Costa ba jornalista sira iha Palásiu Governu Dili, hafoin halo aprezentasaun ba KM, Kuarta (14/11).
Nia esplika, g7+ servisu durante ne’e, promove paz no harii Estadu iha nivel global, atu bele projeta nafatin Timor Leste nia mensajen no nia imajen ba mundu internasional, no ema barak agora rekoñese Timor-Leste nia papel kona ba paz iha mundu.
“Ami mai aprezenta ba Konsellu Ministru kona ba, durante tinan hira nia laran ne’e, g7+ halo saida. Ha’u hakarak hatete ba ita bo’ot sira katak, ita nu’udar ki’ik oan, maibé ita nia fuan ne’e bo’ot, ajuda nasaun sira ne’ebé iha hela konflitu laran hanesan Guine Bissau, Liberia, Guine Konakria, Seralio no Repúblika Sentral Afrikana”,relata Helder da Costa.
Nia salienta, Timor Leste konsege fó paz ba nasaun Repúblika Central Afrikana, no Vatikanu mós rekuñese tebes ida ne’e, tanba sira lafiar katak, Timor Leste bele estabelese paz iha Afrikana.
Nia afirma, ida ne’e orgullu bo’ot id aba Timoroan hotu katak, maske Timor Leste ne’e nasaun ki’ik, maibé konsege estabelese paz iha nasaun seluk, no nasaun seluk mós rekuñese ida ne’e.
“Agora ne’e ita hanesan nasaun amante paz, ida ne’e mak ohin ami update ba Primeiru Ministru ho membru Governu tomak, no sira fó parabens hodi enkoraja ami atu servisu nafatin hodi lori Timor nia naran ba mundu”,relata Helder.
Alende ne’e, Helder da Costa mós informa, iha okaziaun ne’e mós, sira aprezenta orsamentu g7+ nian ba Konsellu Ministru.
“Ami propoint milaun US$ 1.5 miloens, no Governu sei lori ba Parlamentu Nasional hodi diskuti. Ami hakarak hateten hanesan ne’e, nasaun barak iha mundu kuandu atu halo kampaña kona ba paz, sira gasta menus liu mak milaun US$ 30, maibé ita Timor Leste ho de’it orsamentu US$ milaun 1.5, maibé ita konsege manan simpatia husi mundu internasional”,relata Helder.
Helder dehan, nia rona kritikas barak ona mai husi públiku hodi hateten katak, g7+ ne’e gasta osan barak laiha rezultadu, maibé ida ne’e direitu ida-ida nian atu ko’alia.
“Deputadu balun mós uluk hanesan ne’e, halo kritika maka’as ba g7+ maibé depois halo tiha enkontru ho ami hodi hatene lolos ami nia servisu, sira foin hakfodak katak, afinal g7+ ne’e buat bo’ot ida, no to’o agora sira lako’alia ona”, relata Helder.
Entretantu Prezidensia Konsellu Ministru, Agio Pereira mós hateten, reuniaun ordenáriu Konsellu Ministru, Governu rona aprezentasaun klean ida husi husi Sekretáriadu G7+ ne’ebé atu halo tiha ona iha tinan kotuk, maibé la konsege.
“Sekretáriu Jeral g7+ Helder da Costa ho nia ekipa halo aprezentasaun hodi fó informasaun no dokumentasaun konkreta ba Konsellu Ministru hodi haree relevansia no importansia g7+ ho Timor Leste nia polítika estratejika relasaun internasional, no kapasidade lideransa”, Agio Pereira.
Organizasaun g7+ ne’e, harii iha tinan 2010, no to’o oras ne’e, nasaun 20 mak inklina aan iha laran, inklui nasaun Timor Leste. Objetivu husi estabelesimentu g7+ ne’e, atu habelar paz iha nasaun sira ne’ebé iha komflitu nia laran.cos
