Funsionáriu Públiku (FP) atus ida resin ne’ebé servisu iha Electricidade de Timor-Leste (EDTL) hala’o asaun greve kontra kontra Governu liu-liu ministériu kompetente no Komisaun Funsaun Públika (KFP), tanba la pasa iha ezame pasajen eskalaun.
Asaun greve ne’e hala’o iha edifísiu EDTL, Kaikoli, Díli, Sesta (15/11/19), ho objetivu atu husu ba Komisaun Funsaun Públika atu halo jusitifikasaun tanba sá sira la pasa ezame refere.
Asaun greve ne’e partisipa husi reprezentante funsionáriu EDTL husi munisípiu 12 la inklui Rejiaun Administrativa Espesial Oecussi Ambeno (RAEOA).
Porta voz asaun greve Domingos da Costa esplika, total funsionáriu EDTL ne’ebé mak partisipa iha ezame pasajen eskalaun ne’e hamutuk 538, iha ne’ebé rezultadu pasa ne’e nain 33 deit.
Tanba ne’e funsionáriu sira lamenta rezultadu ezame ne’ebé mak fó sai husi Komisaun Funsaun Públika. Funsionáriu sira husu KFP atu halo justifikasaun, sé lae funsionáriu komesa ohin ba oin sira sei hala’o asaun greve.
“Ezame kona-ba hasa’e nivel ne’e funsionáriu EDTL barak mak la liu, maibé ami sira ne’e iha funsionáriu balun servisu komesa iha tinan 1999, funsionáriu balun servisu iha tinan 2000 to’o agora, formasaun ruma mai ami laiha, teste mós ami la liu, entaun ami ezije”,esplika Porta voz asaun greve Domingos da Costa, ba jornalista sira Sesta (15/11/19).
Domingos hatutan, funsionáriu EDTL nia servisu ne’e hasoru risku, tanba kolega balun mate ona, wainhira monta fiu eletrisidade hodi fó naroman ba komunidade. Alende ne’e servisu EDTL mós hatama osan ba kofre Estadu.
“Tanba saida mak sira la konsidera ami hanesan ministériu sira sel-seluk”,dehan Domingos da Costa.
Alende ne’e Diretóra Jerál EDTL, Arlinda Miranda, konsidera asaun greve husi husi funsionáriu EDTL sira ne’e los.
“Tanba durante 16 anos to’o 20 anos ona nunka iha promosaun ba funsionáriu sira iha EDTL. Hanesan ema, ita dehan kesabaran ne’e iha batas. Hanesan diretora ha’u sei koko koalia-tok ho Komisaun Funsaun Públika, depois rezultadu ezame ne’e fó sai kompletu mak ha’u konfirma tok ho ministru”,dehan Arlinda Miranda.avi
