Movimentu Nasional Juventude Timor-Leste MNJTL, komemora ba dala uluk loron manifestasaun Pasífiku hasoru rezimi Soeharto iha Indonezia iha tinan 1991.
Koordenador MJETL, Helder Ximenez Oliveira, hatete, Movimento Juventude no Estudante Universitáriu ne’ebé uluk eskola iha tempu okupasaun Indonézia, halibur malu hodi hanoin hikas loron istóriku, asaun pasífiku ne’ebé akontese iha loron 19 fulan Novembru tinan 1991.
“Objetivu halibur malu ne’e oinsa bele hanoin hikas fali asaun ne’ebé movimentu juventude no estudante sira halo iha tempu difísil nia laran, hodi halo asaun demostrasaun pasífiku iha indonézia iha fatin-fatin, hodi ezije Timor nia direitu ba Estadu indonézia fó diretu ba Timor-Leste atu fó independensia hodi hamrik mesak”, hatete Helder Ximenez ba GMN iha edifísiu 12 Novembru Balide Díli, (19/11).
Helder afirma, komemorasaun ne’e, atu fó hanoin hikas tempu nakukun husi rejime Soeharto nian, ne’ebé Movimento Juventude no Estudante Universitáriu hamutuk 70 resin halo asaun pasífiku iha indonézia.
Iha fatin hanesan, Prezidente 12 de Novembru, Grigório Saldanha fó agradesimentu ba Movimento Juventude no Estudante Universitáriu ne’ebé halo asaun hasoru ditadura Soeharto iha Indonézia momentu ne’ebá.
Fatin ne’ebé Movimentu Juventude no Estudante Universitáriu inklui traballador Timor-oan sira halo manifestasaun pasífiku iha indonézia mak hanesan, iha Jakarta, Bandung, Semarang, Yogyakarta, Surabaya, Malang no Bali.aba
