Família husi matebian Câncio da Silva deskontenti ho atendimentu husi médiku sira iha Hospital Nacional Guido Valadares (HNGV), tanba deskonfia hetan mal-tratamentu no diskriminasaun iha prosesu atendimentu, ho nune’e mak rezulta veteranu Câncio “Badinas Lemorai” hakotu ninia peregrinasaun moris iha mundu, liu husi tratamentu iha HNGV.
“Ami la satisfas ho atendimentu médiku sira iha HNGV, tanba ita haree ema sira ne’ebé mak halo atendimentu iha HNGV ne’e sira halo atendimentu haree liu ba família, sé sira iha relasaun família, entaun sira atende di’ak, kuandu ema ne’ebé laiha relasaun família ho sira, sira abandona tiha”, Família husi matebian, Saturnino da Silva ba GMN iha Becora-Díli, Kuarta (13-11-2019).
Saturnino hateten, veteranu Câncio da Silva “Badinas Lemorai” baixa HNGV, hahú husi loron 4 to’o loron 11, fulan ne’e, hakotu ís iha loron 12, fulan ne’e, maibé laiha doutor espesialista ida mak fó atendimentu no laiha ekipa husi veteranus mai vizita matebian iha HNGV.
“Ho ida ne’e, ami hakarak eziji ba ministériu relevante, liu-liu ba Sekretáriu Estadu Kombatente atu toma atensaun no valoriza veteranu sira ne’ebé sei moris, tanba bazeia ba faktu ne’ebé mak akontese saudozu mai husi Viqueque to’o nia hakotu ís, laiha ekipa veteranus ida mak mai haree no vizita matebian”, tenik nia.
Veteranu Câncio da Silva moris iha aldeia Uatu-Lawa, suku Osso-Rua, postu administrativu Ossu, munisípiu Viqueque, iha loron 13, fulan Jullu, tinan 1972.
Matebian nu’udar oan dahuluk husi maun-alin na’in 3, aman Domingos Guterres no inan Leopoldina da Cruz no husik hela ninia kaben Teresa da Silva Alves, ho oan feto 1 no mane 1.
Mate-isin veteranu Badinas Lemorai halo ona transladasaun ba ninia moris fatin Ossu-Rua, Viqueque, hodi hala’o serimónia funébre.
Tuir diagnóstika médiku nini’an matebian deskonfia hetan moras tuberculose.
Entretantu to’o notísia ne’e públika jornalista seidauk hetan konfirmasaun husi parte HNGV. eni
