GMN TV Sosiedade LPV Sai Deit Matéria Kampaña, FONGTIL Konsidera Líder ParPol “Maupagadór”

LPV Sai Deit Matéria Kampaña, FONGTIL Konsidera Líder ParPol “Maupagadór”

167 views

Diretór Ezekutivu Forum Organizasaun Naun Governamentál Timor-Leste (FONGTIL), Daniel dos Santos Carmo hatete, Lei Pensaun Vitalísia (LPV) iha períodu kampaña eleitorál sempre sai matéria ba líder Partidu Polítiku (ParPol) sira.

Tanba iha ámbitu kampaña eleitorál, líder ParPol sira sempre promete ba povu katak, bainhira sira ba ukun sei halo altterasaun ba LPV, maibé deklarasaun hirak ne’e sosiedade sivíl konsidera hanesan retórika deit, tanba hetan tiha poder promesa ne’e mós sira haluha tiha.

“Ita konsidera sira hanesan polítika ‘maupagadór’, tanba iha kampaña ba koalia buat ida depois povu fó fiar ba sira to’o ikus sira hetan tiha poder ba la halo ida ne’e, sira la halo ida ne’e, tanba sira interese iha laran atu kontinua hetan Lei Pensaun Vitalísia, tanba ne’e ita dehan polítika maupagadór,” dehan Diretór Ezekutivu FONGTIL ne’e, ba GMN, iha nia knaar fatin, Caicoli-Díli Segunda (29/11).

Nia afirma, Lei Pensaun Vitalísia ne’e hanesan Estadu promove hela “injustisa sosiál” iha Estadu Direitu Demokrátiku ida ne’e, tanba komunidade bai-bain sira servisu maka’as mak hetan osan, maibé grupu ki’ik ida ne’ebé toba deit, fulan-fulan ba simu osan povu nian.

“Hanesan organizasaun direitu umanu grupu ida ne’ebé simu pensaun vitalísia ne’e ita promove hela injustisa sosiál iha ita nia-rai, komunidade babain halo esforsu másimu halo tun halo sa’e hodi sustenta sira nia moris, grupu oan ida toba de’it iha uma fulan ba foti osan ne’e, injustisa sosiál” kestiona Daniel.

Foin lalais ne’e mós iha ámbitu komemorasaun loron Proklamasaun Independénsia Unilaterál (28 Novembru 1975) ba dala 46 ba tinan ne’e, iha Munisípiu Baucau, veteranu kombatente balu ejeje ba Prezidente Repúblika (PR) Francisco Guterres Lú Olo atu koalia ho Governu no Parlamentu Nasionál (PN) atu hasai tiha LPV ne’e.

“Pensaun vitalísia ne’e imi foti direta presiza ita hotu hamutuk presiza ita elimina tiha. Se veteranu sira hetan ona benefísiu, maibé to’o jerasaun ne’ebé de’it, ida ne’e mak ha’u iha duvida” dehan Veteranu Adelino Tilman kódigu ‘Kadafi’.

Oan Kiak, Francisca Ximenes husu ba Governu no Estadu atu tau matan ba oan kiak sira ne’ebé lakon ona inan no aman iha funu laran, hodi lori sira nia oan ba asesu edukasaun no la prejiza gasta osan ba membru Governu no membru Parlamentu sira ne’ebé kargu remata ona.

“Husu ba nai Prezidente karik bele fó apoiu netik ba ami oan kiak sira ho ami-nia oan sira iha área edukasaun atu nune’e sira mós bele asesu ba universidade, tanba ami asiste iha televizaun deputadu sira serbisu tinan lima de’it, maibé sira para tiha sei iha nafatin saláriu ida pensaun vitalisia” tenik nia.

Kona-ba preokupasaun hirak ne’e, PR Lú Olo, deklara atu halakon LPV ne’e, kompeténsia PN, tanba sira mak halo lei hodi aprova, nune’e veteranu sira ne’ebé lamenta ho lei pensaun vitalísia, bele halo proposta hodi submete ba órgaun lejislativa, hodi halakon lei ne’e.

Xefe Estadu promete sei hato’o preokupasaun ne’ebé veteranu sira levanta durante enkontru, sei hato’o ba ministériu kompetente, hodi buka solusaun.

“Só altera bainhira iha parlamentu nasional bele muda fali lei ne’e para atu bele repoin fila-fali, lei ne’e direitu ida ne’e tomak ba ninia maun-alin sira ne’ebé sei moris ne’e depende ba PN, PR la halo lei se halo lei haruka ba PR prezidente sei haree benefísia duni ka la benefisia duni se la benefisia prezidente veta haruka fila” afirma Lú Olo.

Lei númeru 1/2007 kona-ba “Pensão Mensal Vitalícia dos Deputados e Outras Regalias”, lei ne’e ho nia artigu hamutuk hitu. Iha mós lei númeru 7/2007 de 25 de Julho Estatuto dos Titulares dos Orgãos de Soberania, iha Artigo 16º “Pensão mensal vitalícia” 1. Os ex-titulares do cargo de Presidente da República, Presidente do Parlamento Nacional, Primeiro-Ministro e Presidente do Supremo Tribunal de Justiça, têm direito a uma pensão mensal vitalícia igual a 100% do vencimento.Ina


Banner

Foto

Notisia Ikus

Governu adia dikusaun ba pedidu reforma Lere Anan Timur

January 20, 2022
Reuniaun Konsellu Ministru (KM) iha Palásiu Gov...

La atende kontaktu deputadu nian, PPN “hirus” MOP Salvador

January 20, 2022
[caption id="attachment_59069" align="aligncenter"...

CNE seidauk simu lista kandidatura PR

January 19, 2022
[caption id="attachment_59064" align="aligncenter"...

Eis Padre Martinho Gusmão deklara kandidata-an ba PR

January 19, 2022
Eis padre Martinho Germano da Silva Gusmão anú...

Ministru José Agustinho “ameasa” hasai funsionáriu APORTIL 24

January 19, 2022
[caption id="attachment_59043" align="aligncenter"...
1 2 3 683

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker