Atu garante liña komunikasaun entre komunidade, inklui família tantu rai liur nomos rai laran ho efikas iha tempu Natal no tinan foun, Komapañia telekomunikasaun TELKOMCEL, estabelese ona Posco TELKOMCEL ho naran Grupo Siaga Naro (GSN).
CEO,TELKOMCEL, Yogi R. Bahar, hateten, objetivu husi estabelsimentu GSN ne’e atu garante liña kliente sira tantu rai liur nomós rai laran iha tempu Natal no tinan foun.
“Primeiru ita hakarak garante atendimentu ba kliente sira, liu-liu oinsa servisu liña komunikasaun labele falha, iha tempu loron boot Natal no Tinan foun,”CEO TELKOMCEL, Yogi R.Bahar, ba jornalista sira iha nia servisu fatin, Aimutin Comoro, Dili, Kuarta (20/12/2017).
Yogi Haktuir, alende atu garante liña komunikasaun entre kliente, iha tempu Natal no tinan foun, objetivu seluk husi programa ne’e mós nu’udar kontinuasaun oinsa kapasitasaun TELKOMCEL iha mundu komunikasaun nian.
Tuir planu Grupo Siaga Naro ne’e sei hahú durante semana rua, husi loron rua nolu fulan Dezembru tinan rihun rua sanolu resin hitu, too loron sia fulan Janeiru tinan rihun rua sanulu resin walu.
“Ida ne’e sei hala’o hahú ohin loron rua nolu to’o, loron sia fulan Janeiru (Semana primeiru ) fulan Janeiru tinan rihun rua sanulu resin walu, tanba situasaun Natal no tinan foun ne’e la’os iha deit loron ida fulan Janeiru semana primeiru husi fulan Janeiru ne’e sei sai hanesan situasaun natal no tinan foun tanba ne’e ita sei to’o iha loron ne’e,”Yogi garante.
Tuir Yogi, ho estabelesimentu programa ne’e sei garante liña entre kliente ne’ebé uza TELKOMCEL tanba grupo ne’e sei prontu iha fatin durante oras rua nulu resin hat nia laran.
“Dala ruma ahi mate iha tempu ne’e, ita-nia ekipa ne’e sei atende, tanba ne’e mak ami kria grupo ne’e atu prontu kualker oras iha loron boot Natal no tinan foun,”dehan Yogi.
TELKOMCEL husu Estadu hakotu problema interna
Nune’e mós, atu garante investidor sira kontinua investe iha Timor Leste, Kompañia TELKOMCEL husu ba Estadu Timor Leste, atu hakotu ona problema polítika interna.
“Ami respeita situasuan polítika ne’ebé akontese iha Timor, maibe nu’udar investidor ami hein katak bele hotu lalais ho rezultadu ne’ebé diak, atu nune’e ami nu’udar investidor bele hala’o ami-nia investimentu ho diak no lais tanba importansia husi investimentu iha Timor Leste ne’e ba interese dezenvolvimentu TL nian rasik,”CEO TELKOMCEL Yoga. R, Bahar ba jornalista sira iha nia servisu fatin, Aimutin Comoro Dili, Kuarta (20/12/2017), relasiona ho situasuan polítika ne’ebé kontinua sai polémika.
Yoga afirma, alende interese dezenvolvimentu Nasional, investimentu TELKOMCEL iha Timor Leste ne’e mos atu minimiza númeru dezempregu iha TL. Tanba ne’e husu ba ukun nain sira, liu-liu Governu no Parlamentu Nasional atu hakotu ona problema rai laran liu-liu iha parte polítika nian.
Kompañia TELKOMCEL hahú harii iha TL, iha loron sanulu resin hitu fulan Setembru tinan rihun rihun rua sanulu resin rua, ho total funsionariu hamutuk nain atus ida sia nulu (190).Ola
