Juventude Fatumeta Hadomi Paz, lakohi atu sai intrumentu ba polítiku nain sira nia interese.
``Ami juventude hakarak moris iha paz, harmonia no trankuilidade hodi partisipa direta iha prosesu dezenvovimentu nasionál iha país ida ne´e. Tanba ne´e, juventude lakohi sai instrumentu ba polítiku sira-nia interese,``esplika Portavoz Juventude Fatumeta Hadomi Paz, Daniel Henriques, liu husi konferensia imprensa, Segunda (04/12/2017), iha Fatumeta Díli.
Juventude Fatumeta Hadomi Paz, mós husu ba lideransa nasionál sira atu hamutuk rezolve tensaun polítika interna.
``Husu ba lideransa nasionál hanesan maun Xanana Gusmão, Mari Alkatiri, Taur Matan Ruak, Lú-Olo, no José Ramos-Horta, atu hamutuk rezolve tensaun polítika interna, ne´ebé konsidera preokupasaun entidade hotu nian,``dehan Daniel Henriques.
Portvaoz ne´e hatutan, lideransa sira presiza garante estabilidade nasionál atu nune´e bele hatudu ba iha jerasaun foun sira katak, lideransa nasionál sei iha komitmentu no espiritu unidade nasionál ba povu rai doben Timor-Leste, hodi hateke ba mehi dezenvovimentu ba rai ida ne´e no povu ida ne´ebé sakrifika a´an tomak ba independensia nasional.
Juventude Fatumeta Hadomi Paz, husu mós ba lideransa sira atu tau a´as interese nasionál no povu mak a´as liu duke interese partidaria ne´ebé la fó benefisiu ba povu.
``Husu ba ukun nain sira atu responsabiliza ba mensajen ne´ebé povu tatoli liu husi eleisaun jeral liu ona katak, povu konfiansa ba partidu lima ne´ebé mak asentu iha Parlamentu Nasionál atu servisu hamutuk ba rai doben Timor-Leste,``dehan Daniel Henriques.avi
