Governu gasta rihun 90 resin selebra loron veteranus

Sekretariu Estadu Veteranus Andre da Costa ‘L4’ hatete, husi enkontru  ikus ne’ebe halao husi Kombatentes Libertasaun Nasional, Komisaun Organizadora nia preparasaun minimu tebes atu selebra loron Veteranus nian, iha loron 3 fulan Marsu tinan 2018, tambá montante orsamentu ne’ebe kiik, hamutuk Rihun 90 resin.

“Ami halao reuniaun ba dala ikus nian ne’e, hodi koalia konaba ajenda atu komemora loron veteranus nian, tamba sesta feira sei iha semináriu, no Primeriu Ministru ho senhor Taur Matan Ruak mak sei sai orador   iha semináriu refere, koalia ho tema ida idak ninian, iha ne’ebe senhor Primeiru Ministru sei koalia konaba moris Vetranus nian, no sr. Taur Matan Ruak sei koalia  konaba tambá saída mak, loron 3 fulan Marsu sai loron Veteranus nian” Dehan Sekretariu Estadu  dos Veteranus ba jornalista sira kinta feira ne’e (01/03/2018) iha Ministeriu Solidariedade Sosial Caicoli Dili.

Salienta L4, tuir ajenda ne’ebe sira desidi ona, iha loron 3 sei iha isar da Bandeira Falintil ho Bandeira Nasional, no Prezidenti Republika mak sei prejidi  selebrasaun ne’e.

“Ami kuaze halao preparasaun durante fulan rua resin, tambá foin primeira vez halao  aniversariu ba loron veteranus ne’e, maibe preprasaun ne’e minimu tebes, tambá montante orsamentu kiik, hamutuk rihun 90 resin, nune’e mak ami konvida deit veteranus sira ne’ebe desmobilizados, sira ne’ebe uluk iha estrutura, no balun mai husi rai liur, no mos konvidadus seluk mos husi estranjeiru” Afirma L4.

Hatutan Sekretariu Estadu ne’e, veteranus sira husi Munispiu mai balun to’o ona Dili, no balun mos orsida kalan kalan sei to’o iha Dili, atu prepara sesta  feira dader tuir eventu ne’ebe mak sei halao.Iha ajende mos ba loron seminário ne’e nian, primeira parte sei halao lansamentu de prasa 28 de Novembru, no tuir mai mak sei halao semináriu iha Centru Convensoens Dili.Oly