Matias Boavida husu ba SECOMS foun atu dezenvolve Media iha TL

Sekretariu  Estadu  Konsellu  Ministru  no  Komunikasaun  Sosial (SECOM),  Matias  Freitas  Boavida, husu  ba  SECOMS  foun  atu labele  hanoin  estraga de’it, maibe  tenki  servisu  hamutuk  ho media  nain  sira  hodi  bele  dezenvolve  diak  liu tan  media  iha  Timor-Leste.

Governante VII Governu Konstitusional nee prefere ba membro governu foun nebe sei troka ninia posisaun iha SECOMS atu  toma atensaun ba  kna’ar  jornalista  sira  hodi  bele  goza  sira nia  direitu  no  bele  asesu  informasaun  diak  no  informa  ba publiku  ho diak.

“Hein  katak, mai ne’e  la  hanoin ho pensamentu  destroi de’it  ,maibe  tenta  atu  kontinua haburas,  hau  prefere  tau  tan  estrumi  diak  ba orgaun sira  ne’ebé  ita iha  ,servisu  hamutuk ho midia  nain sira  atu bele  dezenvolve  diak  liu tan  midia  iha  Timor laran no  mos  barak liu ba  jornalista  sira  ninia  kna’ar mos  nune’e jornalista  sira  bele goza  direitu  atu  sai  porta voz ba  publiku  atu  ita bele hetan informasaun  ida ne’ebé  diak” ,Sekretariu  Estadu  Konsellu  Ministru  no  komunikasaun  Sosial  Matias  Freitas  Boavida,hato’o  nia  esperansa  ne’e  liu husi  nia entrevista  ba  Jornalista  sira iha  Hotel Vila Verde Dili, Sesta (25/5).

Governante nee membro governu foun nebe sei mai líder SECOM nee atu  hala’o kna’ar  nu’udar  servidor  ba  Estadu  no  povu  tomak,  laos  atu  servi  ba  ema ida ka rua  de’it  no  ba partidu ida nian.

“Hau nia hanoin hirak ne’e sai  hanesan  lia menon diak ida ba atu  ita bele kontinua  hala’o kna’ar  nu’udar servidor  do povu  ,ita labele servi nem partidu,  ema ida ou ema rua  ,maibe nu’udar ajente Estadu  para servi  bem  Estadu no ba  povu Timor-Leste tomak”, apela  SECOMS  Matias  Freitas  Boavida.

Matia Boavida hatutan ninia mandatu nudar SECOMS fulan walu deit ,nune’e iha tempu  besik  sei  husik  kargu  SECOMS  nian,sei  sai  hanesan  dosente  iha  Universidade  Nasional Timor Lorosa’e  (UNTL).

 “Hau  antes  ne’e dosente UNTL mesmu  que  hau hala’o  hau nia kna’ar  Sekretariu  Estadu  Konsellu  Ministru  no  komunikasaun  Sosial  ,maibe  hau nia vida loro-loron hau  sempre  iha aula no hau nunka falta  iha hau nia aula mos” SECOMS  Matias  Freitas  Boavida,informa.tos