Prizioneiru 584 partisipa EA

Prizioneiru iha Prijaun Becora-Díli hamutuk  nain 584 mak partisipa iha Eleisaun Antesipada (EA) iha Sabadu (12/05/18), hodi ezerse  sira-nia dereitu hanesan sidadaun Timor-Leste.

Iha estasaun de votu ambulante espesial ba prizioneiru sira ne’e, votasaun hahú iha tuku 08:30 la hanesan estasaun votu sira seluk ne’ebé hahú tuku 07:00 dadersan.

Estasaun ambulante ne’e hola parte husi sentru votasaun iha Sabraka-Laran Becora.

“Atu informa de´it katak, totalidade ema atus nen rua (602), maibe sira  ne´ebé mak ezerse sira-nia dereitu atus lima ualu nulu resin hat (584), ho rajaun  ita hasai tiha ema estranjeiru nain sanulu resin ualu (18),“esplika Diretór Prizional Becora, João Domingos ba jornalista sira hafoin ezerse nia dereitu votu iha estasaun votu Prijaun Becora, Díli.

Alende ne´e iha  prizioneiru Timor-oan nain sanulu resin ida (11) ne’ebé hetan  moras mental no hala´o hela  tratamentu saúde.

Servisu prizional konfirma ona ho dotor sira katak, ema sira ne´e husi loron ba loron hemu hela aimoruk no espera sira bele vota hotu.

Eleisaun antesipada  ne´ebé mak  estasaun votu ambulante espesial  iha  prijaun Becora  ne´e hetan  seguransa husi Guarda Prizional rasik no apoiu husi Polísia Munisípiu Díli, Polísia Unidade Espesial (UEP) no observasaun husi observador nasional no internasional, fiskais partidu polítiku no koligasaun partidaria sira.avi