STAE-CNE muda obrigatorio centru votasaun Aiteas

Sekretarido Tekniku Administrasaun Eleitoral (STAE) no Comisaun Nacional de Eleisaun (CNE) Municipiu Manatuto muda obrigatorio centru votasaun ne’ebe lokaliza iha Eskola Primaria Aiteas, postu administrativu Manatuto Vila, Municipiu Manatuto.

Razaun muda tanba, possu sintina husi komunidade ne’ebe hela besik centru votasaun Eskola primaria Aiteas ku’ak, ho ida ne’e prejudika aktividade votasaun iha centru ne’e.

Delegadu CNE, Municipiu Manatuto, Ricardo Pinto Guterres, hateten, bainhira la muda fatin bele afeta ba ema nia saude no fo impaktu ba eleitoral sira atu vota, tanba is maka’as.

Maske nune’e, muda centru votasaun refere la dook husi fatin primeiru, ho distansia labele liu metro atus ida.

“Hau simu informasaun katak iha centru votasaun ne’e katak akontese possu sintina ku’ak entaun nia is afeta ba ofesial centru votasaun sira hodi hala’o sira nia kna’ar, ho ida ne’e hau informa dereita ba CNE nasional no konkorda katak bele muda, maibe tenke hare mekanismu, nune’e hau koordena kedas ho STAE municipiu hodi muda centru votasaun ne’e,” hateten  Delegadu CNE, Municipiu Manatuto, Ricardo Pinto Guterres ba GMN iha centru votasaun Aiteas, Municipiu Manatuto, Sabado (12/05/2018).

Nia hatutan, kuandu la muda maka afeta saude ba ofesial sira ne’ebe hala’o serbisu durante loron tomak, fo mos impaktu ba eleitores sira atu ba vota katak bainhira sira forma maka horon maka’as  no sira sei la vota.

Iha fatin hanesan, Direktur STAE Municipiu Manatuto, Vicente Soares klarifika liu tan katak, razaun STAE no CNE konkorda muda obrigatorio centru votasaun ba fatin seluk atu nune’e fo espasu ba eleitor sira hodi ezerse sira nia votu.

“Akontesementu ne’e foin maka akontese, ami muda fatin ne’e, tanba possu sintina husi Madre sira nian maka ku’ak no is sai maka’as, nune’e STAE komfirma ho CNE hodi muda,” hateten Vicente Soares.

Ho mudansa fatin, Lideransa masimu STAE municipiu Manatuto nian ne’e garante katak sei la akontese irregularidade ruma.

Entretantu prosesu votasaun iha centru votasaun Eskola primaria Aiteas municipiu Manatuto la’o diak, tanba hetan observasaun husi STAE no CNE no fiskais partidus politikus, observador nasionais no internasionais inklui seguransa husi PNTL. mia